Ստացվում է՝ 10 000 մարդ հա՛մ չի ծառայում, հա՛մ չի դատվում, հա՛մ փող չի տալիս. սա կարևոր խնդիր է, որ պետությունը պետք է լուծի. Կոնջորյան

«Քաղաքացիական պայմանագիր» խմբակցության անունից ելույթում խմբակցության ղեկավար Հայկ Կոնջորյանը մտավախություն ունի՝ «Զինվորական ծառայության և զինծառայողի կարգավիճակի մասին» օրենքում լրացումներ և փոփոխություն կատարելու մասին և Հայաստանի Հանրապետության քրեական օրենսգրքում լրացում կատարելու մասին օրենքների նախագծերի փաթեթը կյանքի կոչելուց հետո, հնարավոր է խնդիրներ առաջանան։

Կոնջոյանի խոսքով` այս նախագծից կարող են օգտվել 25 տարին լրացած քաղաքացիները, այն քաղաքացիները, որոնց 25 տարին օրենքի ընդունման պահի դրությամբ չի լրացել, հետագայում չեն կարող այս օրենքից օգտվել:

«Այն դիտարկումը, որ ասվում է, որ մենք սրանով վարք ենք ձևավորում, չի աշխատում այս դեպքում, որովհետև վարք չի ձևավորում այս նախագիծը: Այս նախագիծը պայքարում է հետևանքների վերացման դեմ, ոչ թե կանխորոշում է ինչ-որ մի վարք կամ կանխարգելում է ինչ-որ մի բան: Սա շատ կարևոր է, որ հասկանանք, կարևոր է խնդիրներն արձանագրելիս ճիշտ բան արձանագրենք»,- ասաց Կոնջորյանը:

Նրա խոսքով՝ այս պահի դրությամբ հետախուզման մեջ գտնվող շուրջ 10 հազար հայրենակիցներ ունենք, որոնք չեն ծառայել բանակում և պետք է ենթարկվեն քրեական պատասխանատվության, սակայն շատ քչերն են պատասխանատվության ենթարկվել:

«Ստացվում է՝ 10 հազար մարդ հա՛մ չի ծառայում, հա՛մ չի դատվում, հա՛մ փող չի տալիս: Սա կարևոր խնդիր է, որ պետությունը պետք է լուծի: Եկեք օրենքին չվերագրենք մի բան, որն ի բնե այն չի փորձում կարգավորել»,- ասաց Կոնջորյանը։

Նա նախագիծը ներկայացնող  Հայկ Սարգսյանին հորդորեց այս ընթերցումից հետո մինչև հաջորդ ընթերցում, գործընկերների հետ քննարկումներ կազմակերպել։