Միայն անհայրենիք մեկը կարող է անիմաստ համարել Արցախի համար օգտագործված ժամանակն ու ռեսուրսները․ Սեյրան Օհանյան

ՀՀ իշխանությունների կրավորական կեցվածքի պայմաններում Արցախը ոչ միայն հանձնվեց Ադրբեջանին, այլև ամբողջովին հայաթափվեց։ Այս մասին ասաց «Հայաստան» խմբակցության ղեկավար Սեյրան Օհանյանը՝ խորհրդարանական ճեպազրույցի ժամանակ։ 

Նա նկատում, որ սա էլ ամենը չէ․ այսօր ՀՀ իշխանությունները չունեն մշակված ոչ մի ռազմավարական ծրագիր Արցախի ու արցախցիների ապագայի համար, ավելին` հրաժարվել են դրանից։ Օհանյանը նկատում է, որ իշխանությունն անգամ մերժեց «ՀայաՔվե»-ի նախագիծը, որով նախատեսվում էր Ադրբեջանի ցեղասպան արարքը քրեորեն պատժելի որակել։

«Յուրաքանչյուր հայ այսօր գիտակցում է, որ Արցախի հարցը չի փակվել, միայն անհայրենիք մեկը կարող է անիմաստ համարել նրա համար օգտագործված ժամանակն ու ռեսուրսները՝  ուրանալով այն փաստը, որ քառորդ դարից ավելի հենց Արցախն է եղել Հայաստանի ազատության ու անվտանգության երաշխավորը, սահմանապահը»,- ասաց Սեյրան Օհանյանը՝ հավելելով, որ Արցախյան ազատագրական պայքարը մերօրյա մաքառումն էր։

Ըստ նրա՝ պետք է շարունակել պայքարը, քանի որ հակամարտությունն ավարտված չէ, այն ավելի է խորացել և սրվել։

«Արցախը եղել է գործոն ու այսօր նրա սուբյեկտայնության պահպանման համար բոլոր ինստիտուտները պետք է գործեն՝ ներառյալ ժողովրդի ճակատագրի ու նաև ժողովրդի վերադարձի պայմանների լուծում, իսկ բանակցությունները միջազգային հարթակում, ցանկացած ձևաչափով, այլընտրանք չունեն»,- ասաց ընդդիմադիր խմբակցության ղեկավարը։