Կարևոր է, որ բանակցությունները կրկին չվերադառնան զրոյական կետի․ Սարգիս Խանդանյան

«Քաղաքացիական պայմանագիր» խմբակցության պատգամավոր, ԱԺ արտաքին հարաբերությունների հանձնաժողովի նախագահ Սարգիս Խանդանյանը շատ կարևոր է համարում, որ բանակցությունները կրկին չվերադառնան զրոյական կետի։ 

Նրա խոսքով` տեղի են ունեցել բանակցություններ, որտեղ սկզբունքային հարցերի քննարկումներ են տեղի ունեցել։

«Մի քանի ռաունդ տեղի են ունեցել բանակցություններ՝ տարբեր մակարդակներում, որտեղ ընդհանրացվել են սկզբունքային հարցերը՝ խաղաղության պայմանագրի ստորագրման շուրջ»,- ասաց Սարգիս Խանդանյանը՝ ԱԺ ճեպազրույցի ժամանակ։

Պատգամավորը վստահեցնում է՝ հայկական կողմը միշտ պատրաստ է բանակցությունների, այդ Ադրբեջանն է խուսափում բանակցություններից։

ՔՊ-ական մեկ այլ պատգամավոր՝ Արթուր Հովհաննիսյանն էլ, արձագանքելով բանակցային հարթակների հետ կապված հարցին՝ վստահություն հայտնեց, որ բանակցային հարցում կողմերի տրամադրվածությունը բխում է իրողությունից։

«Հարթակների հետ կապված մենք նշել ենք, որ Հայաստանի համար առաջնայինն այն է, որ սկզբունքները պահպանվեն այն հարթակներում, որտեղ տեղի կունենան բանակցությունները. սկզբունքներն են՝ տարածքային ամբողջականության ճանաչում, ճանապարհների ապաշրջափակումը՝ յուրաքանչյուր երկրի սուվերենության ներքո։ Այս սկզբունքների պահպանության դեպքում մենք չենք տարանջատում հարթակները»,- ասաց նա։