Ադրբեջանում հայկական ժառանգության պահպանման հարցը անհրաժեշտ է տեղափոխել միջազգային հարթակ

Հայաստանի պատմության թանգարանի ցուցասրահներից մեկում կայացավ «Ինքնության մասունքներ կորուսյալ Գարդմանից, Շիրվանից և Նախիջևանից» խորագրով ժամանակավոր ցուցադրության բացումը, որը կազմակերպվել է «Գարդման-Շիրվան-Նախիջևան» համահայկական միության հետ համագործակցությամբ։ Ցուցադրությունում ներկայացված է պատմական Հայաստանի կորուսյալ տարածքներից՝ Նախիջևանի, Գարդմանի և Շիրվանի հայկական մշակութային ժառանգությունը փաստող մի մեծարժեք ընտրանի, այդ թվում՝ պատմական քարտեզներ, միջնադարյան կոթողներ, գորգեր, զարդեր, լուսանկարներ։

«Արմենպրես»-ի հետ զրույցում միության նախագահ, ԱԺ պատգամավոր Վիլեն Գաբրիելյանը նշեց, որ իրենք տվյալ ցուցադրությամբ նպատակ են հետապնդում ներկայացնել հայկական տարածքների պատմամշակութային ժառանգությունը, որը հարյուրամյակների ընթացքում կուտակել են Գարդմանում, Շիրվանում և Նախիջևանում ապրած մեր հայրենակիցները։

«Նրանք փաստացի թողել են հսկայական ժառանգություն շատ տարածքներում և բռնի տեղահանվել են ադրբեջանցիների կողմից։ Այդ ժառանգությունը գտնվում է անպաշտպան վիճակում։ Մեր նպատակն այն է, որ բարձրաձայնենք, հանրայնացնենք, այդ թվում՝ միջազգային հանրության ուշադրությունը սևեռենք տվյալ խնդրի վրա»,- ասաց Գաբրիելյանը։