Բազեյանի նկատմամբ իշխանությունների նման գործելաոճն անընդունելի է. «Միասին» շարժում

«Միասին» այլընտրանքային հասարակական-քաղաքական շարժումը տարածել է  հայտարարություն, որտեղ ասված է.

««Միասին» այլընտրանքային հասարակական-քաղաքական շարժումը խստորեն դատապարտում է շարունակական բնույթ կրող քաղաքական հետապնդումները և կալանավորումները հասարակական և քաղաքական գործիչների նկատմամբ։

Ակնհայտ է, որ փորձ է արվում ահաբեկել, վախի մթնոլորտում կանխել որևէ քննադատական խոսք, անհնազանդության դրսևորում։

Այդպիսի կալանավորման է ենթարկվել պահեստազորի գնդապետ, «Մարտական խաչ» շքանշանի ասպետ Ալբերտ Բազեյանը՝ իբրև ինչ որ հանցավոր խումբ ղեկավարելու մեղադրանքով։ Ըստ Ա․Բազեյանի փաստաբանի հայտարարության, խուզարկությամբ իր վստահորդի տնից չի հայտնաբերվել որևէ ապօրինի զենք, փաստաթուղթ կամ այլ իր։ Նրան նկատմամբ սեպտեմբերի 21-ին փակ դատական նիստում որպես խափանման միջոց է ընտրվել 2 ամսով կալանավորումը, որի ընթացքում որևէ քննչական գործողություն նրա հետ չի կատարվել, տեղի չի  ունեցել գործին առնչվող այլ անձանց հետ առերեսում, ինչի մասին նրան տեղեկացրել են։ Քննիչը հիմնավորել է կալանավորելու անհրաժեշտությունը Հայաստանը լքելու և արդարադատությունից խուսափելու պատճառաբանությամբ։ Ա․Բազեյանը հայտարարել է, որ անգամ չի ճանաչում այդ անձանց։  2023 թ․ նոյեմբերի 21-ին կայացվել է կալանավորումը ևս երկու ամսով երկարաձգելու ոչ իրավաչափ որոշում։ Սա ոչ այլ ինչ է, եթե ոչ մարդուն հնարավորիս երկար փակի տակ պահելու, նրա ընդդիմադիր գործունեությունը սահմանափակելու միջոց։

Իշխանությունների նման գործելաոճն անընդունելի է։ Բացահատ է, որ պարոնայք «հեղափոխականները» ոչ թե ձախողել են խոստացված դատական (և ոչ միայն) բարեփոխումները, այլ ամեն ինչ անում են դատական իշխանությունն ի նպաստ իրենց պաշտոնավարման երկարաձգմանը ծառայեցնելուն։ Միայն թե նմանատիպ գործելաոճը մարդու իրավունքների ոտնահարում է իրեն ժողովրդավարության «բաստիոն» ծաղրանքի արժանի անունը կպցրած իշխանության կողմից»։