Մարդու իրավունքերի պաշտպանը կարող է դառնալ գործիք՝ որոշ ուժերի ձեռքում, բայց ես այդպիսին երբևէ չեմ դառնալու․ Գլխավոր դատախազի ընկերուհի Մանասյանը «դրանցից» չէ

Մեր աշխատանքի հետ կապված դժգոհություններ, բացառապես քաղաքական գործունեությամբ զբաղվող անձիք են ներկայացնում։ Այս մասին լրագրողների հետ զրույցում ասաց ՄԻՊ Անահիտ Մանասյանը՝ արձագանքելով հարցին, որ օրերս մի խումբ քաղաքացիներ ՄԻՊ գրասենյակի դիմաց բողոքի ակցիա են կազմակերպել՝ նշելով, թե՝ ՄԻՊ-ը տեղում չէ։

Անահիտ Մանասյանն ասաց, թե՝ կարևորում է խոսքի ազատության իրավունքը, բայց կարևորում է նաև, որ այդ իրավունքը ներկայացվի իրավաչափ եղանակով։

«Ինձ համար կարևոր է լսել մեր աշխատանքի մասին տարբեր տեսակետ, բայց դրանք պետք է ներկայացված լինեն իրավաչափ եղանակով»,- ասաց նա։

Այն, որ ՄԻՊ գրասենյակի դիմաց ակցիա է կազմակերպվել ՄԻՊ աշխատանքի դեմ՝ Մանասյանի համոզմամբ, տարբեր քաղաքական ուժերի ձեռքի գործն է։

«Բազմիցս եմ ասել, ու հիմա էլ եմ ասում․ ես երբևէ, որպես ՄԻՊ, և ոչ էլ այլ պաշտոնում չեմ դառնալու գործիք՝ քաղաքական տարբեր ուժերի ձեռքում՝ անկախ նրանից, թե որ քաղաքական ուժերն են դրանք, և իմ գործունեությունն իրականացնում եմ բացառապես իրավական սկզբունքների, իրավական արժեքների և մարդու իրավունքների արժեքների հիման վրա։ Անում եմ եզրահանգումներ բացառապես այն դեպքում, երբ այս արժեքների հիման վրա ունեմ վստահություն»,- ասաց Մանասյանը։

Նա, իհարկե, չի բացառում, որ որոշ դեպքերում մարդու իրավունքների պաշտպանը կարող է դառնալ քաղաքական որոշ գործիչների և ուժերի ձեռքում գործիք, բայց և վստահեցնում է, թե՝ ոչ իր դեպքում, ինքն այդ մարդը չէ։

«Ես այդպիսին երբևէ չեմ դառնալու և ինձ համար շատ կարևոր է երաշխավորել, որ հաստատությունն այդպիսին չդառնա»,- եզրափակեց ՀՀ գլխավոր դատախազի ընկերուհի Անահիտ Մանասյանը: