Ինչո՞ւ ՄԻՊ-ը չդատապարտեց Փաշինյանին՝ սպառնալիքներ հնչեցնելու և Սիմոնյանին՝ քաղաքացու վրա թքելու համար․ Մանասյանը «խոսքը կտուրը գցեց»

ՄԻՊ Անահիտ Մանասյանը վստահեցնում է, թե ինքը ոչ մի քաղաքական ուժի կամ գործչի ձեռքին չի դառնալու գործիք։ Այս մասին նա հայտարարեց կառավարության նիստից հետո՝ լրագրողների հետ զրույցում։ Բայց երբ լրագրողները փորձեցին հստակեցնել, թե այդ դեպքում ինչու է գործում երկակի ստանդարտներով, Մանասյանը, այսպես ասած, «խոսքը կտուրը գցեց»։

Լրագրողները մասնավորապես պաշտպանին հիշեցրեցին ԱԺ նախագահ Ալեն Սիմոնյանի և քաղաքացու միջև տեղի ունեցած միջադեպը, երբ Սիմոնյանը թքել էր քաղաքացու վրա, ՄԻՊ-ը նրան չդատապարտեց։

Դրանից բացի, Մանասյանին հիշեցրեցին, որ բռնության կոչերի համար մի շարք քաղաքացիներ են դատապարտվել, բայց երբ օրինակ վարչապետի մակարդակով սպառնալիք է հնչել, թե ՝ «ասֆալտ կուտացնենք», «ողնաշարներ կջարդենք», «պետք լինի՝ Բաքու կուղարկենք»․․․ այս դեպքում ՄԻՊ-ը ձայն չի հանել։

Փորձելով դուրս գալ հարցի «տակից»՝ Անահիտ Մանասյանը նշեց, թե՝ իբր, բոլոր պետական մարմինների հետ, ինքը բացառապես իրավական գործիքներով է խոսում։

Նա նշեց, թե իբր «իրավական մեթոդաբանության վրա հենվելով` եզրահանգում են արել» ինչ-որ պետական մարմնի նկատմամբ։ Թե որ մարմնի՝ չմասնավորեցրեց, բայց նշեց, որ միայն այդ դեպքում է եզրահանգումը լինում «անխոցելի»։

«Ոչ ոք չի կարող ասել՝ այս հանգամանքը կողմնակալ է, թե ոչ, եթե պահպանվում է իրավաբանական մեթոդաբանությունը»,- ասաց նա՝ նշելով, որ իրենց գործառույթը դատապարտելը չէ։

Ճշտող հարցին, թե ատելության խոսքը չպե՞տք է դատապարտվի, Մանասյանը միանշանակ դրական պատասխանեց՝ վստահեցնելով, թե դատապարտում են։

Ամեն դեպքում, նա այդպես էլ չանդրադարձավ հարցին, թե ինչու այդ դեպքում ՄԻՊ-ը չդատապարտեց Փաշինյանին՝ սպառնալիքների համար և Ալեն Սիմոնյանին՝ թքելու համար։