Դուք միանգամից ուզում եք սենսացիոն պաշտոնանկություններ. ըստ Անդրանիկ Քոչարյանի` Սուրեն Պապիկյանը չպետք է հրաժարական տա

Սուրեն Պապիկյանը չպետք է հրաժարական տա: Այս մասին Ազգային ժողովի բակում լրագրողների հետ զրույցում ասաց ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը` պատասխանելով լրագրողների դիտարկմանը բանակում տիրող ոչ կանոնադրային հարաբերությունների հետևանքով զինծառայողների մահվան դեպքերի մասին: 

«Դա նախաքննությունն ավարտվելուց հետո պարզ կդառնա: Նախ պետք է հասկանալ` ինչու է եղել ինքնասպանություն, եթե դա ինքնասպանություն է, և ինչու է տեղի ունեցել սպանություն, եթե դա սպանություն է: Այսինքն` դա պետք է քննվի, քննելուց հետո պարզ կդառնան մեղավորները և նրանց շրջանակը: Դուք միանգամից ուզում եք սենսացիոն պաշտոնանկություններ: Էդպես չի: Էդպես եթե մենք գնանք, էսօր ոչ մի պաշտոնյա իր տեղում պետք ա չլինի: Դրա համար էլ ամեն ինչ պետք ա լինի օրենքի շրջանակներում»,- ասաց Քոչարյանը: 

Լրագրողը հիշեցրեց Նիկոլ Փաշինյանի` դեռևս վարչապետ չեղած ժամանակաընթացքում արված այն գրառումը, թե զինծառայողների մահվան դեպքերը չպետք է լինեն լրատվամիջոցների վերնագրեր, այլ պետք է ունենան կոնկրետ պատասխանատուներ և հարցրեց Քոչարյանին, թե ինչու նրա իշխանության օրոք չենք տեսնում կոնկրետ պատասխանատուներ: 

«Լավ էլ տեսնում եք: Երբ որ ուզում եք տեսնում եք, երբ որ չեք ուզում` չեք տեսնում` նայած էդ օրը ոնց եք արթնացել»,- ասաց Քոչարյանը: