«10 տարի հետո իմ 27 տարեկան տղան կարո՞ղ է գալ ու ասել՝ էս օրենքով ուզում եմ ազատվել ծառայությունից»․ «Մենք Ձեր զավակին սպասումից կզրկենք, տիկին Պողոսյան»

ՀՀ ԱԺ պաշտպանության և անվտանգության հարցերի մշտական հանձնաժողովի նիստի ժամանակ քննարկվում է ՔՊ խմբակցության պատգամավոր Հայկ Սարգսյանի «Զինվորական ծառայության և զինծառայողի կարգավիճակի մասին» օրենքում լրացումներ և փոփոխություն կատարելու մասին օրենքի

ՔՊ-ական Քրիստինե Պողոսյանը փորձեց իր ճշտող հարցն ուղղել նախագիծը ներկայացնողին։

«Օրինակ՝ 10 տարի հետո իմ 27 տարեկան տղան կարո՞ղ է գալ ու ասել, որ 27 տարիս լրացել է, չեմ ծառայել, ես էս օրենքով ուզում եմ ազատվել»,- հարցրեց նա։

Հանձնաժողովի նախագահ Անդրանիկ Քոչարյանն էլ փորձեց անհաջող կատակել․ «Մենք Ձեր զավակին սպասումից կզրկենք, տիկին Պողոսյան»։ 

Հայկ Սարգսյանը նշեց, որ այս նախագծում ոչ մի անձնական շահ չկա՝ օրենքը երկրի պետական շահն է հետապնդում։

«Չեմ ուզում տպավորություն լինի, թե դուք կամ ինչ-որ մեկը պետք ա իմ խաթր կողմ կամ դեմ քվեարկի։ Խնդրում եմ՝ մտեք օրենքի բովանդակության մեջ, հասկացեք, եթե օրենքը մեր երկրի պետական շահին է միտված, քվեարկեք կողմ, եթե տեսնում եք, որ վնասելու է, խնդրում եմ՝ դեմ քվեարկեք, բայց համոզվեք, թե սա իրենից ինչ է ներկայացնում»,- ասաց Հայկ Սարգսյանը։

Նա նկատեց, որ ինքն իր այս նախագծով ապահովելու է հավելյալ պահեստազոր և պաշտպանության փոխնախարար Արման Սարգսյանին դիմելով՝ ասաց, որ իրավունք չունեն հրաժարվել այդ ռեսուրսից։

«Դուք պետք է շնորհակալությամբ դա ընդունեք։ Ասում եմ՝ 14 հազար քաղաքացի ունենք, որոնք դիմում են գրում, քաղաքացիություն ստանում, բայց չեն ծառայում։ Ասում են՝ ուզում եմ հա՛մ ձեզ փող տամ, հա՛մ ծառայեմ, հա՛մ էլ ձեր պահեստազորում հաշվառվեմ, որ պատերազմի ժամանակ էս ռեսուրսն օգտագործեք, դուք ասում եք՝ չեմ ուզում, հիմնավորեք`ինչի չեք ուզում։ Փաստացի, մարդիկ քաղաքացիություն են ստանում, ո՛չ ծառայում են, ո՛չ գումար են մուծում ու ուշ տարիքում պահեստազորում են հաշվառվում, որը չենք կարողանում օգտագործել։ Ձեզ հավելյալ ռեսուրս եմ տալիս, հիմնավորեք, թե ինչի չեք ուզում։ Չասեք՝ անարդարացի ա և այլն, անարդարացին նա է, որ այս քաղաքացիները մինչև 28 տարեկան սպասել են, նոր են քաղաքացի դարձել, ո՛չ ծառայում են, ո՛չ էլ գումար են մուծում։ Ես էս մասին 2021 թվականին էլ եմ բարձրաձայնել, երբ օրենքի փոփոխություն բերեցի, որով զոհված զինծառայողների տղաներին և եղբայրներին ազատում էինք ծառայությունից, ասում էին՝ բոլորը պետք է ծառայեն, բայց թվերով ցույց եմ տալիս, որ բոլորը չեն ծառայում։ Հավելյալ ռեսուրս եմ տալիս, եթե չեք կարողանում տնօրինել էդ ռեսուրսը, էդ ուրիշ հարց ա, կադրային քաղաքականությունը փոխեք, բայց ռեսուրսից մի հրաժարվեք»,- ասաց Հայկ Սարգսյանը։ 

ՊՆ փոխնախարարն էլ պնդեց, որ թե՝ օրենքն ընդունելով նպաստելու են, որ մարդիկ ոչ թե գան, այլ գնան երկրից։

Ամեն դեպքում նա փորձեց «չնեղացնել» Հայկ Սարգսյանին։

«Ես Ձեր ազնիվ մղումներին չեմ կասկածում»,- ասաց նա։