Եթե ինչ-որ մեկը խիղճ ունի, կամ հանդգնություն ասելու, որ մեր պարտավորությունները չենք կատարել՝ ձեր փաստարկները դրեք սեղանին․ Մարիա Զախարովա

«Սրանցից որևէ մի կետ չի իրականացվե՞լ: Եթե ինչ-որ մեկը խիղճ ունի, կամ դրա բացակայության դեպքում՝ հանդգնություն ասելու, որ դրա մի մասը չի կատարվել, ներկայացրեք փաստերը, ձեր փաստարկները դրեք սեղանին։ Բայց դրանք չկան, բացի հիստերիայից ու վիրավորանքներից»։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան մեկնաբանելով ռուս խաղաղապահների հասցեին հնչեցված մեղադրանքները։

Նա մեջբերել է Ռուսաստանի Դաշնության Դաշնային խորհրդի 2020 թվականի նոյեմբերի 18-ի որոշումը, որում ասվում է, որ ռուսական խաղաղապահ զորախումբը ուղարկվում է տարածաշրջան «հրադադարի մասին պայմանավորվածությունները պահպանելու, ինչպես նաև խուսափելու Լեռնային Ղարաբաղի խաղաղ բնակչության զանգվածային զոհերից և խաղաղ բնակչությանը զգալի վնաս պատճառելուց։

«Կատարվեց ճիշտ այն, ինչ գրված էր փաստաթղթում, հնարավոր եղավ կանխել հենց այն, ինչին վերաբերում էր այս փաստաթուղթը։ 2023 թվականի սեպտեմբերին տարածաշրջանում վերջին էսկալացիայի ժամանակ ռուս խաղաղապահների պրոֆեսիոնալ գործողությունների շնորհիվ, նրանց ակտիվ միջնորդությամբ, 2023 թվականի սեպտեմբերի 20-ին պայմանավորվածություն է ձեռք բերվել դադարեցնել ռազմական գործողությունները և բանակցություններ են վարվել Լեռնային Ղարաբաղի հայ բնակչության և Ադրբեջանի իշխանությունների միջև։

Ռուս խաղաղապահներն ապաստան են տրամադրել խաղաղ բնակիչներին, հումանիտար օգնություն են հասցրել և կազմակերպել բժշկական տարհանումներ։ Եվ ոչ ոք իրավունք չունի վիրավորել նրանց, և մենք նրանց վիրավորողներին պատասխան կտանք»,- ասել է Զախարովան։

Ինչ վերաբերում է Ղարաբաղում էթնիկ զտումների մասին պնդումներին, ապա նա նշել է, որ եթե կա գոնե որևէ փաստաթուղթ Երևանում հեղինակավոր համարվող որևէ միջազգային կազմակերպությունից կամ որևէ հայտարարություն, որը ցույց կտա, որ նման էթնիկ զտումներ են տեղի ունեցել, տրամադրել  այդ փաստաթղթի հղումները։

«Մենք մեր կողմից բազմիցս նշել ենք Բաքվի հայտարարությունների հիման վրա հայ բնակչության՝ Ղարաբաղ վերադարձի համար պայմաններ ստեղծելու կարևորությունը»,- ասել է Զախարովան։