«Վա՜յ, մենք ասել ենք՝ Նախիջևանը Հայաստան է, «Ղարաբաղը Հայաստան է», «գնալու ենք Բաքվում թեյ խմենք», իրենք էլ ասել են՝ գալու են Սևան, թեյ խմեն»․ ըստ Սիմոնյանի՝ Ալիևը հայելային ձևով արձագանքել է ՀՀ-ին (տեսանյութ)
Ալիևը հայելային ձևով կրկնում է այն, ինչ մենք ասել ենք այս 30 տարի` «Նախիջևանը Հայաստան է», «Ղարաբաղը Հայաստան է», «Գնալու ենք Բաքվում թեյ խմենք»։ Այս մասին լրագրողների հետ զրույցում ասաց ԱԺ նախագահ Ալեն Սիմոնյանը՝ արձագանքելով Ադրբեջանի նախագահ Իլհամ Ալիևի հայտարարություններին։
«Դուք չեք տեսնո՞ւմ, որ այն, ինչ հայտարարություն անում է հարևան երկրի նախագահը, հայելային ձևով կրկնում է այն հայտարարություններին, որոնք արել է հայկական կողմը անցած 30 տարվա ընթացքում։ Տրամաբանությունը մտել է հայելային խոսակցության մեջ․ մենք խոսում ենք զորքերի հայելային հետքաշման մասին, հիմա կարող ենք խոսել նաև հայելային հռետորաբանության մասին։ Այսինքն՝ Ալիևը խոսում է մի բանի մասին, որպեսզի հակակշիռ ստեղծի այն նարատիվներին, որի մասին 30 տարի ասել ենք»,- ասաց Ալեն Սիմոնյանը։
Հարցին, թե՝ բայց մենք ասե՞լ ենք, որ Բաքուն Հայաստանն է, Ալեն Սիմոնյանը զարմանքով արձագանքեց․ «Վա՜յ, մենք ասել ենք, որ Նախիջևանը Հայաստան է, ասել ենք, որ «Ղարաբաղը Հայաստան է», ասել ենք, որ «գնալու ենք Բաքվում թեյ խմենք», իրենք էլ ասել են, որ գալու են Սևան, թեյ խմեն»,- ասաց Ալեն Սիմոնյանը։
