Ո՞վ ասաց, որ Հայաստանը մտածում է, որ բոլոր պարագաներում պետք է խաղաղություն լինի՝ հարկ եղած դեպքում, պաշտպանվելու ենք մինչև վերջ․ Ալեն Սիմոնյանը չի բացառում՝ կարող են լինել նաև ուղիղ բանակցություններ

Մենք չենք պատրաստվում որևիցե մի երկրի վրա հարձակվել ու արդեն ասել ենք, որ տարածքային պահանջ էլ չունենք։ Այս մասին լրագրողների հետ զրույցում ասաց Ալեն Սիմոնյանը։

Ամեն դեպքում, ասել, որ դրանով խաղաղությունը երաշխավորված է՝ Ալեն Սիմոնյանը չի պատրաստվում։

«Բայց ո՞վ ասաց, որ Հայաստանի Հանրապետությունը մտածում է, որ բոլոր պարագաներում պետք է խաղաղություն լինի։ Բնականաբար, մենք բանակ ունենք, մեր բանակը զարգացնում ենք և, հարկ եղած դեպքում, պաշտպանվելու ենք մինչև վերջ։ Բայց մենք չենք պատրաստվում հարձակվել»,- ասաց Ալեն Սիմոնյանը։

Նա հասկանում է, որ հարաբերությունների կարգավորմանը թե՛ խանգարող, թե՛ օգնել ցանկացող ուժերն իրենց շահերից ելնելով են որևէ քայլ անում։

«Ոչ հայի սիրուն աչքերի ու ոչ էլ առաջին քրիստոնյա ազգ լինելու համար է, օրինակ, Ֆրանսիան կամ էն մեկն ուզում օգնել՝ իջեք երկնքից, դրանք հեքիաթներ են։ Այդ երկրներն ունեն շահեր, որոնք մեզ հետ համընկնում են կամ չեն համընկնում»,- ասաց Ալեն Սիմոնյանը։

Նրա խոսքով` այն երկրները, որոնք ցանկանում են լծակներ ունենալ Ադրբեջանի ու Հայաստանի նկատմամբ՝ փորձում են «լավ միջնորդ» լինել, որպեսզի ապահովեն իրենց լծակները։

Ալեն Սիմոնյանը չի բացառում՝ կարող են լինել նաև ուղիղ բանակցություններ, առանց 3-րդ երկրի, որի նախադեպը, Ալեն Սիմոնյանի խոսքով արդեն եղել է;