Արցախից բռնահանվածների վճարումները կարող են ուշանալ․ երբեմն ստիպված ենք լինում ստուգել․ նախարար

Այս պահի դրությամբ 100 հազար դրամի չափով աջակցություն է տրամադրվել 112 080 տեղահանվածի։ 40+10 հազար ծրագրի շրջանակներում հոկտեմբեր ամսվա համար վճարվել են 104 027-ը, նոյեմբեր ամսվա համար՝ 77 503 արցախցի։ Այդ մասին տեղեկանում ենք ԱՍՀՆ նախարար Նարեկ Մկրտչյանի՝ Կառավարություն-ԱԺ հարցուպատասխանի ժամանակ ներկայացված տվյալներից․

«50 000 դրամի չափով օժանդակություն նոյեմբեր ամսվա համար վճարվել է 69 429 անձի, դեկտեմբեր ամսվա համար՝ 74 439։ 

Ըստ ԱՍՀ նախարարի՝ հունվարյան վճարումները շարունակվում են, այսօր արդեն շուրջ 15 000 մարդ ստացել է որոշակի վճարումներ․ «Ինչ վերաբերում է նպաստներին, ապա 135 անձի նշանակվել է երեխայի ծննդյան միանվագ նպաստ, 191 անձի՝ մայրության նպաստ, 174-ին՝ մինչև 3 տարեկան երեխայի նպաստ: Հայտերը շարունակում են ընդունվել և մշակվել։

Կենսաթոշակները կվճարվեն յուրաքանչյուր ամսվա 5-ին, իսկ նպաստները Լեռնային Ղարաբաղից տեղահանվածները կստանան նույն օրը, ինչ Հայաստանի քաղաքացիները,- նշել է նախարարը։ 

Մկրտչյանը նաև հայտնում է՝ Արցախից բռնի տեղահանված բնակիչների վճարումները կարող են ուշանալ տարբեր տվյալների բազաների հաշտեցման պատճառով. 

«Երբեմն ստիպված ենք լինում ստուգել աշխատանքի նախարարության տվյալների բազաները ՆԳՆ տվյալների հետ, որպեսզի պարզենք, թե կոնկրետ անձը Հայաստանում է, թե ոչ։ Հստակեցվել են 20.000 անձի տվյալները, նրանցից 15.000-ի համար վճարումները պատրաստվել են բաշխման համար:

Կենսաթոշակ և նպաստ ստանում են արդեն մոտ 12000 արցախցիներ՝ նույն կարգով և ժամկետներում, ինչ Հայաստանի քաղաքացիները»։