3 բնակարան Երևանի Կենտրոնում, 317 մլն 832 հազար դրամի եկամուտ. ինչ է հայտարարագրել Լևոն Քոչարյանը

«Հայաստան» խմբակցության պարտագամավոր, ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը ներկայացրել է 2023 թ-ի հայտարարագիրը՝ պատգամավոր ընտրվելու կապակցությամբ. գրում է «Փաստինֆո»-ն: 

Քոչարյանը հայտարարագրել է 3 բնակարան Երևանի կենտրոն համայնքում և մեկ ավտոտկայանատեղի։ Բնակարաններից մեկը և ավտոկայանատեղին նա ձեռք է բերել 2009 թ-ին, երկրորդը՝ 2012-ին, երրորդը՝ 2013-ին։ Նա նաև հայտարարագրել է TOYOTA մակնիշի 2 ավտոմեքենա և 2020 թ-ի արտադրության LEXUS մակնիշի ավտոմեքենա, որը 90 օրից ավելի փաստացի գտնվել է իր տնօրինության ներքո, սակայն սեփականության իրավունքով պատկանել է երրորդ անձի։

Նա ներդրումներ ու արժեթղթեր ունի 5 տարբեր անձանց բիզնեսներում կամ ընկերություններում։ Մասնավորապես, 2015-ին 31մլն 830 հազար դրամի ներդրում է կատարել եղբոր՝ Սեդրակ Քոչարյանի բիզնեսում, Նույն թվականին 100 հազար եվրոյի բաժնեմաս է ձեռք բերել «Մուդելայզեր ԱԲ»-ում, 2014-ին 5000 դրամով արժեթղթեր է ձեռք բերել Սամվել Ստեփանյանի բիզնեսում, 2016-ին ՝ 300 հազար դոլարով ձեռք է բերել արժեթղթեր «ԷՔՍԶԵԼ ԱՈՒԹԴՈՐՍ» ՍՊԸ-ում, 2008-ին Հովիկ Շահինյանի բիզնեսում ներդրել է 1 մլրդ 74 մլն դրամ։

Քոչարյանը հայտարարագրել է նաև հանձնված փոխառությունները, որոնցից 2-ը հանձնվել է «Հայաստանի Ուժային Եռամարտի Ֆեդերացիա» ՀԿ-ին՝ 9000 դոլար և 4 մլն 270 հազար դրամի չափով, իսկ երրորդը՝ 244 մլն 452հազար դրամի չափով՝ հանձնվել է «Զեմկոմինվեստ» ՍՊԸ-ին։

Հատկանշական է, որ 4 մլն դրամից ավելի թանկարժեք այլ առարկաներ, մասնավորապես զարդեր, կտավներ եւ այլն Քոչարյանը չի հայտարարագրել։

Փոխարենը հայտարարագրել է 10 բանկային հաշիվ, որոնցից առաջինին 6,700 SEK տեսակի կրիպտոարժույթ է, 2րդի վրա եղել է 64 747 դոլար, 3-րդ հաշվի վրա՝ 769 դոլար, 4-րդին՝ 16 732 դրամ, 5-րդին՝ 75 եվրո, 6-րդին՝ 217 դոլար, 7-րդին՝ 154 000 դրամ, 8-րդին՝ 0.95 եվրո, 9-ին՝ 108 դոլար, 10-րդին՝ 18 մլն 363 հազար դրամ։

Միաժամանակ, պատգամավորն հայտարարագրել է 4 մլն 300 հազար դրամ կանխիկ դրամ։

Տարվա ընթացքում նրա եկամուտները կազմել են 317մլն 832 հազար դրամ։ Եկամուտի հիմնական աղբյուրը «Նաիրի Ինշուրանս» ապահովագրական ընկերությունն է, որից ընդհանուր առմամբ ստացել է 303 մլն 442 հազար դրամի եկամուտ։ Եկամտի մեծ մասը շահաբաժնից ստացված եկամուտն է, մի մասը՝ աշխատանքի դիմաց վարձատրությունը, մի մասն էլ տրված փոխառությունների հատուցումն է։

Մանրամասները` սկզբնաղբյուրում