Ինձ համար տարօրինակ է, որ մարդը զանգում է 1-03 և նրանց չեն արձագանքում․ եթե զանգում է, ուրեմն հրատապ է․ Տիգրան Ավինյան

Երևանի քաղաքապետ Տիգրան Ավինյանը դատապարտում է բոլոր այն դեպքերը, երբ բռնություն է գործադրվում բժիշկների նկատմամբ՝ իրենց ծառայությունն իրականացնելիս։ Բայց, միևնույն ժամանակ, նրա համար տաօրինակ է, որ մարդիկ զանգահարում են 1-03 և նրանց չեն պատասխանում։ Երևանի քաղաքապետարանի գործակարգավարական խորհրդակցության ժամանակ Ավինյանը նշեց, որ այս մասով բավականին անելիքներ կան։

«Ինձ հետաքրքիր է՝ ի՞նչ դեպք է լինում, որ մարդ զանգում է 1-03 և նրան չեն պատասխանում»,- հարցրեց նա՝ քաղաքապետարանի աշխատակազմի առողջապահության վարչության պետի պաշտոնակատար Դավիթ Կարապետյանին։

Նա միայն նշեց, թե որ զանգերն են համարվում առաջնային և երկրորդային։ «Գոյություն ունեն մի քանի տեսակ զանգեր․ առաջինն անհապաղ կանչերն են, որոնք անհետաձգելի բժշկական օգնություն են պահանջում, երբ բուժառուի կյանքին ակնհայտ վտանգ է սպառնում: Դրանից հետո գալիս են առաջին տեսակի բուժօգնության կանչերը, հետո՝ երկրորդ և երրորդ։ Առաջին տեսակն իրականացվում է 20 րոպեի ընթացքում, երկրորդը՝ 45, երրորդը՝ 60։  Երբ ջերմության կանչով ծառայությունը գնում է այդ կողմը, և այդ ընթացքում ստանում են անհապաղ կանչ, ուղղությունը, բնականաբար, փոխում է, և գնում են այդ անհապաղ կանչին»,- ասաց Կարապետյանը։

Նա վիճակագրություն չուներ, թե այդ զանգերի մեջ քանի զանգ են անտեսում։

«Մարդը, եթե զանգում է 1-03, ուրեմն կա հրատապություն, և որակը պետք է բարելավվի և ապահովել 100 տոկոս ապահովում՝ զանգին պատասխանելու առումով»,- ասաց Ավինյանը։