Գոնե Պրահայի հանդիպումից հետո պետք է ընդդիմության կողմից կեցվածք լիներ, բայց ոչինչ չեղավ․ հիմա ումի՞ց են ինչ պահանջում․ ռազմական փորձագետ

Եթե մենք ոտքի կանգնենք, կան պետություններ, որ ոչ թե մեր, այլ իրենց շահերից ելնելով, կօգնեն մեզ, բայց եթե մենք ոչինչ չենք անում ու առավոտից իրիկուն միայն ասում, թե ՝ Պողոս-Պետրոսը չեկավ, չօգնեց՝ այդպես հարց չենք լուծի։ Այս մասին ասուլիսի ժամանակ ասաց ռազմական փորձագետ Հայկ Նահապետյանը։

Նա նկատում է, 2022թ․-ին՝ Պրահայի հանդիպումից հետո գոնե պետք է ընդդիմության կողմից կեցվածք լիներ, բայց ոչինչ չեղավ։

«Կա՛մ չեն հասկանում, կա՛մ չեն ուզում»,- ասաց ռազմական փորձագետը՝ ավելի հակված լինելով այն մտքին, որ ընդդիմությունն անգործության է մատնված։

Նա ընդգծում է, որ եթե մենք չփոխենք մեր կեցվածքը, ապա վաղը, մյուս օրը՝ գնչուների նման թափառական կդառնանք։

«Էս մեր երկիրն է, մեզ է տված, չէ՞, հիմա ո՞ւմից ենք բողոքում։ Թուրքերը տափաստաններից ու այլ տեղերից եկեն՝ տեր կանգնեցին մեր հայրենիքին, բողոքում ենք, որ ի՞նչ։ Եկան ուժով վերցրին, հիմա, եթե կարաս՝ ուժով նորից հետ վերցրու՝ ումից կամ ինչի՞ց եք բողոքում»,- ասաց ռազմական փորձագետը՝ դիմելով ընդդիմությանը։

Ըստ նրա՝ պատերազմը հակառակորդի մեջ վախ մտցնելու արվեստ է։

«Մենք մեր կռիվն արդեն արել էինք, ու այդ վախը մտցրել թշնամու մեջ, բայց 44-օրյա պատերազմը՝ հակառակ հետևանքը թողեց»,- ասաց բանախոսը՝ նշելով, որ ընդդիմությունը ոչ թե խոսքով, այլ գործով պետք է ցույց տա, որ պատրաստ է վերադարձնել հայրենիքը։