Ֆիզկուլտինստիտուտը վերադառնում է հին բարքերին. ուսանողներին խոստացել են, որ այսուհետ գնահատականները «շատ հեշտ են ստանալու»

Ինչո՞ւ Ֆիզկուլտինստիտուտը մեր օրերում այդպես էլ չընդունվեց որպես որակյալ կրթություն մատուցող բուհ։ Երևի թե, որովհետև այդ ինստիտուտում հին բարքերն ավելի կարևոր են, քան ուսանողների կրթությունը։

Ի՞նչէ սա նշանակում։

Նախ նշենք, որ Ֆիզկուլտինստիտուտում ռեկտորի ժ/պ է նշանակվել Տիգրան Սիմոնյանը՝ մի մարդ, ով իր աշխատանքային պարտականությունները լավ չկատարելու հետևանքով հեռացվել էր դեկանի պաշտոնից։

Ի դեպ՝ վերջինիս կինը կասկածվում է նորածնի վաճառքի մեջ։ Վերոնշյալ ժ/պ–ն կամայական որոշումներով դադարեցրել է Գիտական խորհրդի անդամների լիազորությունները ու իր աջակիցներով նոր Խորհուրդ ձևավորել, որն ըստ ամենայնի գործելու է ի շահ «ընտրյալների» ու նրանց որոշ ժամանակով դատարկ մնացած գրպանների։

Իսկ որտեղի՞ց է բուհի աշխատակազմի և հին ծանոթների շրջանում առաջացել վախը, որ «հին ու բարի» բարքերը վերադառնալու են։ Թերևս այն հանգամանքով պայմանավորված, որ բուհում բարեխոսությամբ գնահատական շռայլելը խոչընդոտող քննական համակարգը՝ փակ գրավոր քննությունները, փոխարինվում են բանավոր քննություններով։

Բուհի ուսանողներին արդեն իսկ խոստացել են, որ իրենք այսուհետ գնահատականները «շատ հեշտ են ստանալու»։ Բայց խեղճ ուսանողները չգիտեն, որ անվճար պանիրը միայն թակարդում է լինում։ Ի՞նչ են պահանջելու «բարեհոգի» դասախոսները միամիտ ուսանողներից։ Գուցե հետո իմանանք․․․

Այժմ գիտենք մի քանի բան․ բուհում որոշում կայացնող օղակներում ներգրավում են միայն համախոհներ, որոնք, այսպես ասած, տարբեր «մախինացիաների» «հին գելեր են», բուհում կտրականապես մերժվում են իրենց ոլորտում հաջողած մարդիկ, ովքեր վտանգ են ներկայացնում կոռուպցիայի համար, ընդունվում են որոշումներ, որոնք հակասում են ընթացակարգերին ու կանոնակարգերին։ Ենթադրվում է, որ այս ամենն արվում է քաոս ստեղծելու ու բուհը միավորելու ճանապարհին մի քանի մեքենա ու անշարժ «ետ գցելու» համար։

Պատկերն ավելի հստակ ցուցադրելու համար հարկ է նշել կարևոր հանգամանք՝ Ինստիտուտի ռեկտորի ժ/պ–ն, որը մեկ օրում պրոռեկտոր է աշխատանքի ընդունում ու նույն օրը համոզում ազատման դիմում գրել, ընտրվել է Հոգաբարձուների խորհրդի նախագահ Կարեն Գիլոյանի կողմից՝ պատահականության սկզբունքով, նախկին ռեկտոր Դավիթ Խիթարյանին անվստահություն հայտնելուց հետո:

Ի՞նչ է լինելու Ֆիզկուլտինստիտուտի հետ՝ երևի թե գիտեն միայն Կարեն Գիլոյանն ու այդ շենքի վրա աչք դրած օլիգարխը։

Իսկ ի՞նչ են անելու այն ուսանողները, որոնք կրթության հետևից էին եկել։

NEWSPRESS.am