2023-ին մարդկանց վրա թափառող կենդանիների հարձակման 134 դեպք է գրանցվել․ Կարեն Հակոբյան

Թափառող կենդանիների վերաբերյալ ՆԳՆ ահազանգերը հիմնականում եղել են թափառող շների կողմից քաղաքացիների վրա հարձակվելու, կծելու, ագրեսիվ լինելու, աղբամանների մոտ հավաքվելու վերաբերյալ: Այս մասին ԱԺ-ում «Թափառող կենդանիների խնդիրները Հայաստանում» խորագրով քննարկմանը հայտարարեց ՀՀ ՆԳՆ ոստիկանության պետի տեղակալ, ոստիկանության գնդապետ Կարեն Հակոբյանը։

Նա նշեց, որ քաղաքացիների ահազանգը կապված է եղել նրա հետ, որ մարդիկ, թափառող կենդանիների պատճառով, վախենում են իրենց երեխաներին թողնել միայնակ։

Կարեն Հակոբյանն ասաց, որ վարչական տարածքներում և մարզերում կենդանիների ստերջացման հարցը խնդիր է։ Նրա խոսքով՝ մարզերում մասամբ է իրականացվում կամ իրականացվել։ 

«Հրազդանում տեղի ունեցած դեպքերի վերաբերյալ քրեական վարույթ են նախաձեռնել, երկու դեպք է տեղի ունեցել, մեկը թունավորում, մյուսը մասսայական սպանդ, հանցագործությունները դեռևս բացահայտված չեն»,- ասաց նա։

Մեկնաբանելով տարածվող տեղեկատվությունը, թե համայնքի ղեկավարի կողմից է հրահանգվել սպանդը՝ Հակոբյանն ասաց, որ եթե պարզվի մեղավորների շրջանակը, ապա որևէ մեկն անպատիժ չի մնա։

Անդրադառնալով մեքենաներով շներին վրաերթի ենթարկելու վերաբերյալ հարցին՝ ոստիկանության պետի տեղակալն ասաց. «Քրեական օրենսգրքի 307 հոդվածը, որը նախատեսում է կենդանիների նկատմամբ դաժան վերաբերմունքը, այն դիտավորյալ հանցագործություններից  է։ Անզգուշությամբ կենդանուն մահ պատճառելը քրեական պատասխանատվություն չի նախատեսում»։

Նրա խոսքով՝ կա ճանապարհատրանսպորտային պատահարների կանոնադրություն, եթե վարորդը մեղավոր է, ապա կենթարկվի պատասխանատվության ճանապարհատրանսպորտային երթևեկության կանոնները խախտելու համար։

Կարեն Հակոբյանը ներկայացրեց նաև վիճակագրությունը, ըստ որի` կենդանիների նկատմամբ դաժան վերաբերմունքի դեպքերի թիվը 2023թ․-ին հասել է 45-ի, իսկ արդեն այս տարվա հունվարին՝ 3 դեպք։

Ինչ վերաբերում է կենդանիների կողմից հարձակման ենթարկված մարդկանց, ապա 2023թ․-ին գրանցվել է 134 դեպք։ Իսկ 2024թ․-ի հունվարին՝  գրանցվել է 5 դեպք։