Սպասարկման վարձավճարներ՝ չարված աշխատանքների դիմաց

Գաղտնիք չէ, որ յուրաքանչյուր համատիրություն ինքն է որոշում բնակիչներից հավաքագրվող սպասարկման գումարի չափը: Թե ինչի հիման վրա են թանկանում սպասարկման վճարները, դրա բացատրությունն էլ տալը միայն ու միայն համատիրության մենաշնորհն է: Իսկ շարքային քաղաքացին՝ համատիրության բնակիչն, այդպես էլ չի հասկանում, թե իր վճարած գումարի դիմաց ինչ սպասարկման «արժանացավ»:

Հատկապես այս տարվա հունվարից newspress.am-ը չի դադարում հեռախոսազանգեր ստանալ տարբեր համատիրությունների բնակիչներից, ովքեր դժգոհում են վարձավճարների թանկացումներից:

2 օր առաջ էլ Ավան համայնքի 57-ամյա բնակչուհի տիկին Աիդան մեզ հետ զրույցում ասաց, որ համատիրության սպասարկման գումարը մեկ քառ. մետրի դիմաց վճարվող 17 դրամի փոխարեն դարձել է 25 դրամ: Բարձրացել է նաև վերելակների սպասարկման դիմաց վճարվող գումարները: Թեև համատիրությունից վստահեցրել են, որ մատուցվում են բարձր որակի ծառայություններ, սակայն բնակչուհու խոսքով՝ իրենք ոչ մի փոփոխության ականտես չեն եղել:

«Ուզում եմ հասկանա, ի՞նչ են անում, որ չենք նկատում: Տանի՞քն են նորոգել, բակե՞րն են բարեկարգել, թե՞ սովետից մնացած վերելակներն են փոխել… ի՞նչ են արել, որ չենք տեսնում: Ուրեմն, մենք մեր բերանից կտրենք վճարենք սպասարկման համար, որ իրենք էլ իրենց գրասենյակում տաք-տաք նստած՝ մեր փողից աշխատավա՞րձ ստանան»,- վրդովված ասաց կինը:

Այն, որ աշխատանքներ չեն կատարվում, փաստեցին նաև համատիրության այլ բնակիչներ:

Հետաքրքիր է, թե բնակիչների դժգոհությունների ու չկատարված աշխատանքերի ֆոնին համատիրության աշխատակիցներն ի՞նչ երեսով են սպասարկման դիմաց գումարներ հավաքում ու խոսում սպասարկամ բարձր որակի մասին: