Մարդու երեսին թքում են՝ հանցագործություն չի, Գալեյանի ջուր լցնելը հանցագործությու՞ն է. զոհվածի հայր

Այնպիսի տպավորություն էր, որ դատախազը լավ ծանոթ չէր գործին։ Այս մասին 44–օրյա պատերազմում զոհված զինծառայող Մխիթար Գալեյանի հոր` «Որդիների կանչ» ՀԿ–ի անդամ Գարիկ Գալեյանի գործով դատական նիստից հետո, լրագրողների հետ զրույցում ասաց զոհվածի հայր Արա Ռոստոմյանը։

Նա նշեց, որ մեղադրող դատախազը մեղադրական եզրակացությունն ընթերցելի՝ ոչ մի իրական ապացույց չի ներկայացրել։ Բացի այդ, ըստ Արա Ռոստոմյանի, հաշվի չի առնվել Գարիկ Գալեյանի փաստաբանի ներկայացրած ապացույցները։

«Գակեյանի փաստաբանը հարց ուղղեց, եթե մարդու երեսին թքելը չի համարվում խուլիգանություն՝ ջուր լցնելը համարվում է խուլիգանությո՞ւն, բայց դրան ոչ մի ձևով չանդրադարձավ դատախազը։ Ուղղակի կարդում էր գրվածը»,-ասաց Արա Ռոստոմյանը։

Նա նկատում է, որ այս ժամանակահատվածում օրվա իշխանությունները պետք է կենտրոնացած լինեին անվտանգության խնդիրների վրա, բայց իշխանությունը այսպիսի դատավարություններով ուզում է լռեցնել այն քաղաքացիներին, ուժերին, որոնք ուզում են բարձրաձայնլ տեղի ունեցող պրոցեսների մասին։

«Հայաստանն իր պատմության ընթացքում երբեք նման վիճակում չի հայտնվել՝ դավաճանած իշխանություն, հանձնված տարածքներ, ազգայինն ամբողջովին ոչնչացնելու պրոցես»,- ասաց Ռոստոմյանը։

Հիշեցնենք, որ Գարիկ Գալեյանին մեղադրանք է առաջադրվել թմրամիջոցի իրացման, ֆիզիկական ներգործության և խուլիգանության մեջ։