Ես չեմ հավատում, որ Քոչարյան ընտանիքն այնքան «ընկած է», որ չի կարողանում իր աջակիցների լեզուն ատամների ետևում պահել». Արիանա Հովսեփյան

NEWSPRESS.am կայքի հիմնադիր, հասարարական գործիչ Արիանա Հովսեփյանը ֆեյսբուքյան իր էջում գրել է.

«Մեքենաս այրելու միջադեպը, ըստ ճաշակի, քաղաքականացնողներին:

Քանի որ իր հանցանքը խոստովանած տղամարդը հանդիսանում է Ռոբերտ Քոչարյանի առաջակից ու ենթադրում եմ (իսկ իրականում չեմ ենթադրում, տեսնում եմ), որ նրա շրջապատն էլ հենց քոչարյանականներն են, իսկական արշավ են սկսել իմ դեմ` նաև մտքում ունենալով այն հանգամանքը, որ բազմիցս հարգանքով եմ խոսել Երրորդ նախագահ Սերժ Սարգսյանի մասին: Ինչո՞ւ: Որովհետև մեջքիս հետևից հարվածներ չեմ ստացել Հանրապետականներից, եթե կհիշեք, նույնիսկ ինչ-որ ընթացք, Ռոբերտ Քոչարյանին էլ եմ սատարել, երբ նա բանտում էր: Բայց թիկունքից խաղերը «քանդեցին» Երկրորդ նախագահի տունը...

Հիմա տեղի է ունեցել հանցագործություն ու ոչ քաղաքական հողի վրա: Բայց քոչարյանականները որոշեցին առիթն օգտագործել ու ձեռքերը տաքացնել մեքենայումս բռնկված կրակին:

Չի' կարելի, տիկնայք և պարոնայք, հատկապես այս զանգվածներին կառավարողներ: Զսպեք մանր ու միջին ստատուսչիներին, եթե այս արշավի հեղինակը հենց դուք չեք: Մի զանգով, մի նամակով կարող եք կանխել այն գարշահոտը, որ տարածվել է հատկապես Ֆեյսբուքում: Ես դա ձեզ ընկերաբար եմ ասում, թեկուզ, որպես նույն պայքարի նախկին ընկերներ: Ես չեմ հավատում, որ Քոչարյան ընտանիքն այնքան «ընկած է», որ չի կարողանում իր աջակիցների լեզուն ատամների ետևում պահել:

Սա ընդունեք որպես վերջին հորդոր, կոչ, եթե կուզեք` խնդրանք, բայց հետայսու ես այս հետույքաբնակներին չեմ անդրադառնալու, ես նրանց ո'չ որակին եմ, ո'չ մակարդակին, պատասխանը դուք եք տալու: Դուք` խոշոր ձկներդ:

Ի դեպ, շնորհակալություն եմ հայտնում նաև Երկրորդ նախագահի ընտանիքին կապակցված լրատվամիջոցներին` թեմային անդրադառնալու համար:

Հ.Գ. Այս և այլ թեմաների շուրջ ավելի մանրամասն հարցազրույց եմ տվել «Իրավունքին», որը կհրապարակվի ավելի ուշ»: