Արևմուտքը մի նպատակ ունի` այլ ժողովուրդների ձեռքերով պատերազմել Ռուսաստանի դեմ. Հայկ Այվազյանը` պաշարված Լենինգրադի երեխաներին նվիրված հուշարձանը պղծելու դեպքը կապում է Արևմուտքի ֆինանսավորման հետ

Այսօր Արևմուտքը մի նպատակ ունի` այլ ժողովուրդների ձեռքերով պատերազմել Ռուսաստանի դեմ: Ինքը չի ուզում, որ իր ժողովուրդը զոհվի, ուզում է զոհվեն այլ ժողովուրդներ: Այս մասին այսօր լրագրողների հետ զրույցում ասաց ռազմական փորձագետ Հայկ Այվազյանը` խոսելով պաշարված Լենինգրադի երեխաներին նվիրված հուշարձանը պղծելու խուլիգանական դեպքի մասին: 

«Իրենք այդպես Ուկրաինան պատրաստեցին: Ուկրաինացիներին, որ նույն ժողովուրդն են ռուսների հետ, սկսեցին համոզել, որ իրենք տարբեր ազգեր են, տարբեր պատմություն ունեն, ռուսների հետ կապ չունեն, ապամոնտաժեցին տարբեր հուշարձաններ, պատմությունը փորձեցին ջնջել: Այդպես ուկրաինացիների զգալի մասից սարքեցին մարդկանց մի զանգված, որոնք պատրաստ են իրենց եղբոր դեմ պատերազմել: Դրան հասնելու համար ուկրաինացիների մեջ գտնվեցին տասնակ հիմարներ ու հազարավոր գործակալներ, որոնք կամավոր այդ ամենին գնացին: Նույն բանն Արևմուտքը նախատեսում է այլ ժողովուրդների ձեռքերով անել: Եվ սա առաջին դրսևորումն է, որ մենք տեսնում ենք, այսինք` ջնջել Ռուսաստանի հետ ընդհանուր պատմությունը, հիմնավորել, որ պարտությունների պատճառը Ռուսաստանն է, դրանով իսկ թշնամացնել Ռուսաստանի հետ»,- ասաց Այվազյանը: 

Նրա խոսքով` հակառուսականության մթնոլորտը Հայաստանում իշխանության կողմից է հրահրվում, ինչն էլ ֆինանսավորվում է Արևմուտքի կողմից: