ՀՀ իշխանության քայլերը համարում ենք քաղաքական հետապնդում մեր խմբակցության նկատմամբ, ինչպես նաև իրավական «բեսպրեդել»․ Անդրանիկ Թևանյան

Նա հիշեցրեց, որ «Մայր Հայաստանի» նկատմամբ առաջին քայլը, որ տեղի ունեցավ,  ավագանու անդամ Նարինե Հայրապետյանին էր առնչվում, որը սպառնալիքներ էր ստանում իր քաղաքական գործունեության հետ կապված։ Վերջինս դիմել էր ոստիկանություն, որտեղ հաղորդում էր ներկայացրել։ Սակայն, ըստ Թևանյանի, ոստիկանություն դիմելուց հետո ճնշումների արդյունքում հրաժարվել է իր ցուցմունքից, ապա լքել Հայաստանը։ Երկրորդ դեպքը, որին անդրադարձավ քաղաքական գործիչը, վերաբերում էր ավագանու մեկ այլ անդամի՝ Արշակ Սարգսյանին, որին Աջափնյակ վարչական շրջանում առանց պետհամարանիշի մեքենայով օրեր շարունակ հետապնդել են։ Սարգսյանը դիմել է ոստիկանություն, ինչից հետո միայն հայտնաբերվել է այդ մեքենան, որտեղ գտնվող անձինք բերման են ենթարկվել։ Դեռևս պարզ չեն հետապնդողները և նրանց արարքի պատճառները։

 

Ըստ Թևանյանի` իրենց խմբակցության վրա ՀՀ իշխանության վերջին «հարձակումն» էլ այն է, որ ՔՊ-ն «Հանրապետություն» խմբակցության հետ ավագանու արտահերթ նիստ է նախաձեռնել, որի ժամանակ քննարկվելու է ավագանու «Մայր Հայաստան» խմբակցության 4 անդամի, ինչպես նաև «Ազգային առաջընթաց» խմբակցության 1 ավագանու անդամի լիազորությունները վաղաժամկետ դադարեցնելու հարցը։