ՔՊ-ական պատգամավոր Սերգեյ Բագրատյանը սնանկ է ճանաչվել իր հետ կապ ունեցող ընկերության հայցով

Ազգային ժողովի «Քաղաքացիական պայմանագիր» խմբակցության անդամ, Վայոց ձորի նախկին մարզպետ Սերգեյ Բագրատյանը Երևան քաղաքի դատարանի որոշմամբ ճանաչվել է սնանկ։ Այս մասին տեղեկանում ենք «Դատալեքս» տեղեկատվական կայքից։ 

«Հայաստանի Հանրապետության սնանկության դատարանը, նախագահությամբ դատավոր` Ա.Աթաբեկյանի, քննելով սնանկության գործն ըստ դիմումի Ռուբեն Արտյուշի Բարսեղյանի ընդդեմ Սերգեյ Պապաշի Բագրատյանի՝ Սերգեյ Պապաշի Բագրատյանին սնանկ ճանաչելու պահանջի մասին  

Վ Ճ Ռ Ե Ց  1. Ռուբեն Արտյուշի Բարսեղյանի դիմումն ընդդեմ Սերգեյ Պապաշի Բագրատյանի՝ Սերգեյ Պապաշի Բագրատյանին սնանկ ճանաչելու պահանջի մասին, բավարարել: Սերգեյ Պապաշի Բագրատյանին ճանաչել սնանկ», - նշված է որոշման մեջ։ 
 
Բանն այն է, որ Ազգային ժողովի «Քաղաքացիական պայմանագիր» խմբակցության  պատգմավոր Սերգեյ Բագրատյանից Երևան քաղաքի դատարանը դեռևս 2018 թվականի հունիսի 11-ի հրապարակված վճռով պարտավորեցրել է հօգուտ «Եվրոդիզել» ՍՊ ընկերության բռնագանձել շուրջ 57.823 ԱՄՆ դոլարին համարժեք դրամ՝ գումարը փոխանցելով «Եվրոդիզել» ՍՊ ընկերության սնանկության հատուկ հաշվին: 
Այս մասին 24News-ը տեղեկանում է «Դատալեքս» տեղեկատվական համակարգից (Դատական գործ՝ N: ԵԴ/6788/02/18) : 
 
Սակայն, ԱԺ պատգամավոր Սերգեյ Բագրատյանը թեև ունեցած ֆինանսական միջոցների, հողատարածքների, բնակարանի, ինչպես նաև լինելով «ԲիԷսԲի» ՍՊԸ-ում 1.98% և «ԳՐՈՒՊ» ՍՊԸ-ի 100% բաժնետոմսերի ղեկավարը, որոնք իմիջայլոց տնօրինում է 2007 և 2002 թվականներից, ճանաչվել է սնանկ։ 
 
Հատկանշական է, որ Ռուբեն Բարսեղյանը 2019թ-ի սեպտեմբերից մինչև 2021թ-ի փետրվար ամիսը հանդիսացել է «Էկո օյլ» ՍՊԸ-ի գործադիր տնօրենը: Նշված ընկերությունը 2021թ-ին ճանաչվել է սնանկ: 24News-ի հավաստի աղբյուրների փոխանցմամբ վերը նշված «Էկո Օյլ» ՍՊԸ-ն պատկանում է ՀՀ ԱԺ պատգամավոր Սերգեյ Բագրատյանին, ընկերությունը զբաղվում էր հիմնականում ԻԻՀ-ից մազութի և դիզվառելիքի ներմուծմամբ: 
 
24News-ը կապ հաստատեց ԱԺ ՔՊ խմբակցության  պատգամավոր Սերգեյ Բագրատյանի հետ, պարզելու, թե ինչպե՞ս է ստացվում, որ, չնայած ունեցած ֆինանսական միջոցներին և բիզնեսներին, դատարանը նրան սնանկ  է ճանաչել, այն էլ իրեն փոխկապակցված  ընկերության տնօրենրի պահանջով։ Ի պատասխան Բագրատյանը նշեց. «Ինչ-որ դուք ասում եք, վաղուց արվել վերջացել է»։ 
 
Դիտարկմանը, այսինքն պահանջվող գումարը վճարե՞լ եք, պատգամավորը նշեց. «Էդտեղ ինչ-որ եղել ա՝ սաղ արվել ա, իրավաբաններն ամբողջությամբ ավարտել են, մենք կապ չունենք դրա հետ: Մենք այդ գործարքի համար երաշխավոր ենք եղել, իրենք իրենց պարտք ու պահանջը ավարտել են, մեր երաշխավորությունն էլ դուրս է եկել, ես էլ չեմ խառնվել»: 
 
Հարցին, այդ դեպքում ինչու՞ էին դիմել դատարան, որպեսզի սնանկ ճանաչվեր, վերջինս նշեց. «Մեկը մյուսի հետ կապ չունի: Ես չեմ դիմել՝ հարկային տեսչությունն է դիմել, ընկերությունը, որ էդ ժամանակ վարկ է վերցրել՝ 150.000 դոլար, էդ մարդը մահացել է, մենք երաշխավոր ենք եղել, իրենք դիմել են, որ կա՛մ էդ մահացած մարդու վարկը մարեն, կա՛մ սնանկ ճանաչեն, բայց էդ պրոցեսն էլ է ավարտվել, բացարձակ պարտք-պահանջ չկա»: 

Թեև Սերգեյ Բագրատյանը նշում է, որ որևէ պարտք ու պահանջ չկա, սակայն մենք վկայակոչում ենք Դատարանի վճիռը, որտեղ հստակ նշված է. 

«Լսելով հայցվորին, ուսումնասիրելով և գնահատելով գործի գրավոր ապացույցները՝ դատարանը գտավ, որ պահանջն ենթակա է բավարարման հետևյալ պատճառաբանությամբ. 

Համաձայն պարտատեր «Արդշինբանկ» ՓԲ ընկերության, պարտապան «Եվրոդիզել» ՍՊ ընկերության և երաշխավոր Սերգեյ Պապաշի Բագրատյանի միջև 31.03.2016թ. կնքված երաշխավորության AԵՊ16/124-01 պայմանագրի 1.1 կետի՝ երաշխավորը պարտավորվել է իր հաշիվներին առկա դրամական միջոցներով, ինչպես նաև սեփականության իրավունքով իրեն պատկանող ամբողջ գույքով լրիվ համապարտ պատասխանատվություն կրել պարտատիրոջ առջև հիմնական պայմանագրով պարտապանի կողմից պարտատիրոջ հանդեպ ստանձնած պարտավորությունները չկատարելու կամ ոչ պատշաճ կատարելու արդյունքում առաջացած ժամկետանց պարտավորությունների համար: 
 
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 23.05.2017թ. որոշմամբ հաստատվել է «Եվրոդիզել» ՍՊ ընկերության սնանկության գործով պարտատերերի պահանջների վերջնական ցուցակը, որում ներառվել է նաև «Արդշինբանկ» ՓԲ ընկերության կողմից ներկայացված 57.823,86 ԱՄՆ դոլարին համարժեք դրամի երաշխավորությամբ ապահովված պահանջը»: