Վարդենիսի համայնքապետարանից պարզաբանում են պետական որոշ կառույցների տեղափոխման մասին լուրերը

Արդեն տևական ժամանակ լուրեր են շրջանառվում այն մասին, որ  սահմանամերձ Վարդենիս քաղաքի անձնագրային և վիզաների վարչությունը կտեղափոխվի մեկ այլ համայնք։ Երեկվանից այս լուրերն սկսեցին ավելի բուռն քննարկվել՝ անձնագրային և վիզաների վարչությանն ավելացան նաև մի քանի այլ կառույցների անուններ։ 

Մասնավորապես, ֆեյսբուքյան օգտատերերն իրենց գրառումներում վստահ պնդում էին, որ կտեղափոխվեն նաև կադաստրի մասնաճյուղը, ինչպես նաև զինվորական հոսպիտալն ու հոգեբուժարանը։

NEWSPRESS.am-ն այս մասին տեղեկությունը փորձեց ճշտել Վարդենիսի համայնքապետարանից։ 

Համայնքի ղեկավար Ահարոն Խաչատրյանի հետ մեզ չհաջողվեց զրուցել, փոխարենը մեր հարցադրումներին արձագանքեց նրա օգնականը՝ Ալիկ Եղիազարյանը։ Նա նախ ասաց, որ այս պահին ոչ մի պաշտոնական բան չունեն (նկատի ունի` որոշում - հեղ.), ապա փորձեց հասկանալ, թե կոնկրետ որ կառույցների մասին է խոսքը։

Ներկայացնում ենք հարցազրույցն ամբողջությամբ․ 

-Այս պահին խոսքն անձնագրային և վիզաների վարչության և կադաստրի մասնաճյուղի մասին է:

-Ի՞նչ կադաստր, կադաստրի մասին բացարձակապես սուտ լուրեր են։ Ի՞նչ կադաստր (նեղսրտած ու նյարդայնացած տոնով շարունակեց), կադաստրի մասին ոչ մի տեսակի բան չկա։ Խոսքը վերաբերում է անձնագրայինին, բայց դրա մասին էլ պաշտոնապես ոչ մի բան չկա։ Դրանով զբաղվում են պատկան մարմինները։ Կզբաղվեն, հետո մենք էլ կիմանանք։ Իսկ մնացած լուրերին՝ էն մեկն ասում է հոսպիտալ, մեկն ասում է հարկային, ոչ մի նման բան չկա։ Բացարձակապես։

-Ես ուրախ եմ, որ նման բան չկա, մի' նյարդայնացեք ու մի' վրդովվեք։ Տարբեր լուրեր էին շրջանառվում, պարզապես ուզում ենք ճշտել։ Ինչ վերաբերում է անձնագրային վարչությանը․ ասում եք՝ դեռևս պաշտոնապես ոչ մի բան չկա, բայց, փաստորեն, տեղափոխվելու է․ մոտավորապես ի՞նչ ժամանակահատվածում է նախատսվում տեղափոխել։

-Ես չեմ կարող ասել։

-Ասենք, օրինակ, առաջիկա մեկ ամսվա մե՞ջ, կամ ավելի շո՞ւտ, որքա՞ն ժամանակից։

-Հա, մոտավորապես այդ վիճակն է, մոտավորապես։ Մյուս շաբաթ զանգահարեք, եթե ավելի ստույգ տեղեկություն լինի՝ ես կտեղեկացնեմ։

Արմինե Մկրտումյան