Սահմանադրական փոփոխությունների օրակարգը կեղծ է․ Մամիջանյան

«Պատիվ ունեմ» խմբակցության ղեկավար Հայկ Մամիջանյանը չի կարծում, թե  Նիկոլ Փաշինյանն ու նրա թիմը կհասցնեն ավարտել սահմանադրության փոփոխության գործընթացը։ Ըստ նրա, այդ օրակարգը կեղծ է։

«Հայաստանի հիմնական օրակարգն այն է, որ Հայաստանի անունից հիմնական բանակցողն այս պահին զբաղված է Ադրբեջանի ուլտիմատումների կատարմամբ»,- ասաց Մամիջանյանը ԱԺ ճեպազրույցի ժամանակ։

Նրա խոսքով՝ վերջին շրջանում մի շարք գործողությունները ցույց են տալիս, որ Նիկոլ Փաշինյանը կողմ է առանց միջնորդի Ադրբեջանի հետ բանակցություններին։

«Իշխանափոխությունը փրկության միակ տարբերակն է։ Եթե տեսնեք, թե ինչ ուղղությամբ են ընթանում բանակցային գործընթացները, քանի ականներ են դրվել այդ գործընթացի տակ վերջին 6 տարվա ընթացքում, կհասկանաք, որ ՀՀ անվտանգությունն այլընտրանք չունի, քան Փաշինյանի հեռացումը։ Այդ մարդը համարում է, որ մեր երկրի միակ պրոբլեմը զինանշանն ու օրհներգն են։ Նա ոչ միայն անփորձ է, ոչ միայն կրթություն ու սթափություն չունի, այլև իր սխալն ընկալելու ունակություն չունի։ 5000 մարդ է զոհվել, ասում է զինանշանն է մեղավոր։ Փաշինյանը բանակցող չէ, նա լսող-ստորագրող է։ Փաշինյանին դեմքը փրկող ինչ-որ բաներ են պետք։ Մի օր կարող է կանգնել ասել Վրաստանի հետ կապվող միջպետական երկու ճանապարհներից մեկը ամբողջությամբ անցնում է Ադրբեջանի վերահսկողության տակ, Սյունիքով Իրանի հետ ապող միջպետական ճանապարհն էլի անցնում է ադրբեջանական դիտարկման տակ, բայց լավ արոտավայրեր եմ բերել, որ տեսնեք ինչ խոտ է»,- ասաց պատգամավորը։