Փաշինյանը շատ թույլ է, դուրս է գալու․ նրա հեռացումն անմիջապես իրավիճակ կփոխի․ Հրանտ Բագրատյան

Բանը բանից անցնում է, Փաշինյանն ամեն օր մի աբսուրդ բան է ասում։ Այս մասին այսօր «Միասին» այլընտրանքային շարժման՝ հանրահավաքի մասին իրազեկող ասուլիսում ասաց շարժման անդամ, Հայաստանի նախկին վարչապետ Հրանտ Բագրատյանը։

«Օրինակ՝ ասում է, որ Ալիևն իբր պնդում է, որ մենք փոխենք մեր հռչակագիրը և այնտեղից հանենք այն կետը, որով 1989 թվականի դեկտեմբերի 1-ին Հայաստանի Հանրապետության Գերագույն խորհուրդը և Արցախի Հանրապետության Ազգային խորհուրդն ընդունել են միասնական որոշում։ Բացարձակ աբսուրդ բան է ասում։ Նախ, եթե դու դա ուզում ես փոխել, մի րոպե ենթադրենք, փոխում ես, լավ, Գերագույն խորհուրդն է ընտրել, Ազգային ժողովով փոխիր, ինչո՞ւ ես Սահմանադրական հանրաքվե անում։ Կամ, չէ՞ որ դու «Խաղաղության պայմանագիր» պիտի ստորագրես Ադրբեջանի հետ, եթե դու ստորագրում ես «Խաղաղության պայմանագիր», ապա ճանաչում ես Ադրբեջանի տարածքային ամբողջականությունը, ավտոմատ հեչ ա լինում 1989 թվականի որոշումը, քանի որ միջազգային օրենքն ավելի բարձր կարգի է։ Բայց դու խաբելով, սուտ ասելով գնում ես առաջ, հասարակությունն էլ լրջորեն նստում, քննարկում է, կուտը գցում է։ Ալիևն իհարկե, ագրեսիվ պահածք ունի, բայց այնպիսի տպավորություն կա, որ ոնց որ Երևանից Փաշինյանն ասի՝ «է՛լ ավելի ագրեսիվ պահիր քեզ, ինչի՞ չես ուզում հարձակվես, հարձակվիր, գրավիր էլի էդ միջանցքը, ինձ էլ կնշանակես քո ներկայացուցիչը Հայաստանում և ես կխուսափեմ հայ ժողովրդի առաջ իմ պատասխանատվության բաժնից»,- ասաց Բագրատյանը։

Նա նշեց, որ իրենք պարտավոր ենք զգուշացնել հանրությանը, որ Փաշինյանն ինչ ասում է՝ սուտ է ասում։

«Կամ ասում է՝ բա չեմ կարողանում զենք բերեմ, բա պարզ չի՞, որ մեզ կասեն քիչ զենք բերեք, ուրեմն պիտի գնանք խաղաղության։ Էդ ի՞նչ խաղաղության է գնում, ո՞վ է էդ թույլիկի հետ հետ խաղաղության գնալու։ Նրա հեռացումն անմիջապես իրավիճակ կփոխի։ Երեկ Ռուսաստանը պարզ հայտարարում էր՝ ՀԱՊԿ-ից ինչի՞ եք դուրս գալիս, ՀԱՊԿ-ը ձեզ պաշտպանելու է, ոչ մի խնդիր չկա։ Ակնհայտ է նաև, որ սա ինչ-ոչ ձևով ապավինել է Արևմուտքին, և Արևմուտքը բացահայտ ասում է՝ ինձ չապավինես, ոչինչ էլ անող չեմ»,- նկատեց բանախոսը։ 

Բագրատյանն այն տպավորությունն ունի, որ Հայաստանն աշխարհաքաղաքական երկու ընտրություն ունի՝ երկուսն էլ վատն է։

«Մեկի դեպքում մենք ունենք՝ երկու թշնամի Ադրբեջան, Թուրքիա, դժբախտաբար, Փաշինյանը սա չի ընտրում, նա ընտրում է երկրորդ տարբերակը, որտեղ իր թշնամիներն է ուզում դարձնել Ադրբեջանին, Թուրքիային և գումարած Ռուսաստանին։ Սրա տակից ոչ ոք չի կարող դուրս գալ»,- արձանագրեց նախկին վարչապետը։ 

Նա ընդգծեց, որ հայ ժողովուրդը պետք է կանգնեցնի իշխանությանը, այլապես ինքը կսկսի մտածել, որ եթե ժողովուրդը սրան չի արձագանքում, ապա ստացվում է, որ մեր ժողովուրդն ինքնակամ գնում է հերթական ցեղասպանության։ 

Նա հիշեցրեց, որ մոտ 30 գյուղերից գրեթե ամբողջությամբ դուրս է բերվել բնակչությունը, և մարզերում արդեն հասկանում են, որ հնարավոր չի այնտեղ ապրել։

Բագրատյանը կոչ արեց փետրվարի 20-ին, ժամը 16։30-ին գնալ հանրահավաքին։ 

«Շատ թույլ է, դուրս է գալու։ Ես շատ բարեկամաբար խորուրդ եմ տալիս Նիկոլ Փաշինյանին, հիմա դուրս արի, ինքնակամ, հետո շատ բարդ է լինելու քեզ համար, դուրս արի, տեսնենք՝ ինչ ենք կարողանում անել։ Տեսնում ենք քայլեր, տեսնում ենք փրկության հնարավորություն»,- ասաց Բագրատյանը։