Հանցագործ Մարտին Ամիրխանյանն այստեղ-այնտեղ գլուխ է գովացել, թե «վերևներից» իր հարցը լուծել են, ընդ որում, ասել է, թե դատավորը ևս խնդիր չէ. Արիանա Հովսեփյան

Կարճ ու հստակ կլինեմ. իմ մեքենան հրդեհած, այնուհետև այդ մասին ֆեյսբուքյան իր էջում խոստովանած` տղամարդ կոչեցյալը` Մարտին Ամիրխանյան անուն-ազգանունով, ըստ ամենայնի ոգևորվել է այն հանգամանքից, որ իր նկատմամբ խափանման միջոց է ընտրվել «բացակայելու արգելքը», ոչ թե, ասենք, կալանքը: 

Ինձ լուրեր են հասնում այն մասին, որ սույն` մեքենայից վրեժ լուծող «ուժեղ տղան» այստեղ-այնտեղ գլուխ է գովացել, թե «վերևներից» իր հարցը լուծել են: Ընդ որում, ոչ բառացի, բայց ասել է, թե` դատավորը ևս խնդիր չէ: Հորջորջացել է նաև, թե ինքը խնդիր չունի, չի դատվելու, իմ մեքենային հասցրած վնասն էլ չի փոխհատուցելու: 

Նախ, այստեղ մի փոքրիկ նկատառում: Այդ ի՞նչ «վերևների» հետ է շփվում իրեն ընդդիմադիր հռչակած պարոնը: Հիմա դու ընդդիմադի՞ր ես, թե՞ վերևների հետ ձեռք-ձեռքի տվող, կողմնորոշվի՛ր: 

Երկրորդ` դիմում եմ հատկապես դատավորին` Արամայիս Ասատրյանին, դատախազներին, քննիչներին ու ընդհանրապես այս գործով շահագրգիռ կողմերին` չտրվել ճնշումների. հանցագործի տեղը բանտում է` հասարակությունից մեկուսացված վայրում:

Խնդրում ու պահանջում եմ` չփորձեք պարտակել հանցագործին ու նրա կատարած հանցագործությունը: Չեմ խոսում այն մասին, որ ինքներդ երբևէ պատասխան եք տալու դրա համար, այլ այն մասին, որ այս հասարակության մեջ սպանության սպառնալիք տալը, այստեղ-այնտեղ, սրա-նրա մեքենաներ հրկիզելն արդարացնելը ստեղծելու է անպատժելիության նախադեպ: 

Չի բացառվում, որ ձեր իսկ կայացրած վճիռները ձեր երեսին շպրտելով` այսպիսի հանցագործները հենց ձեր ու ձեր հարազատներին սպանության սպառնալիք տան ու ձեր մեքենաները հրկիզեն...

Լավ գիտեք` ուր է մտնում սրած բիզը: 

Արիանա Հովսեփյան