Հայաստանի Հանրապետությանը սպառնում են երկու հոգի՝ Ադրբեջանի նախագահը և Նիկոլ Փաշինյանը․ Գեղամ Մանուկյան

ՀՀ ԱԺ «Հայաստան» խմբակցության պատգամավոր Գեղամ Մանուկյանի դիտարկմամբ, Հայաստանի Հանրապետությանը սպառնում են երկու հոգի՝ Ադրբեջանի նախագահը և Նիկոլ Փաշինյանը։

«Այն փաստաթուղթը, որի շուրջ քննարկումներ են լինում Երևանի և Բաքվի միջև, այն կետերը, որոնք պահանջում ու պնդում է Ադրբեջանը, Հայաստանի իշխանությունը, քանի որ վախենում է ժողովրդի դժգոհությունից, փորձում է քայլ-քայլ դրանք կատարել, մաքրել այդ փաստաթղթից, որպեսզի վերջում այդքան իրենց քարոզած կեղծ խաղաղության փաստաթուղթ կոչվածը առանց խնդրահարույց կետի լինի։ Այն, ինչ այս օրերին Տավուշում հայտարարում է Նիկոլ Փաշինյանը, դա ամբողջությամբ Ադրբեջանի պահանջն է եղել բանակցությունների ընթացքում։ Հիմա ինքը փորձում է սեփական ժողովրդին պատերազմով սպառնալով ու բառախաղի միջոցով դա կյանքի կոչել։ Այստեղ կա մի շատ կարևոր խնդիր»,- ասաց Գեղամ Մանուկյանը՝ լրագրողների հետ ճեպազրույցում։

Ըստ նրա, մինչ Հայաստանի իշխանությունները հպարտանում էին սահմանազատման-սահմանագծման գործընթացով, պետք է դիտարկել և՛ միջազգային փորձը, և՛ դասագրքային ու դասական ձևերը։

«Չի կարելի սահմանի 10, 20 կամ 100 կմ հատվածում սահմանազատում ու սահմանագծում իրականացնել, երբ ամբողջ սահմանի մնացած հատվածների մեծ մասում Ադրբեջանը շարունակում է օկուպացրած պահել հայկական հատվածները»,- ասաց պատգամավորը։