Մենք կառչած չենք մանդատներից, եթե համոզված լինենք, որ մանդատները վայր դնելով մեր հիմնական խնդիրը կլուծվի, միանշանակ կգնանք դրան. Քոչարյան

Այս իշխանությունները ինչ եկել են, քաղաքական հետապնդման են ենթարկում հորս, ինձ, և այս վերաբերմունքը շատ լավ հայտնի է. «5-րդ ալիք»-ին տված հարցազրույցում նշել է ԱԺ «Հայաստան» խմբակցության պատգամավոր Լևոն Քոչարյանը:

«Ես հարց եմ տալիս, ակնկալում եմ պատասխան, բայց արդեն որերորդ դեպքն է, որ պատասխան չեմ ստանում: Ամեն անգամ խոսակցությունը գնում է ուրիշ տեղ, հիշում են նախկին ներկան, արդեն հնացած նույն սկավառակն է սկսում պտտվել: Երեկ էլ նույն շարքից էր, բայց հատկանշական էր այն, որ «կառավարության գլուխ» դիմելաձևից ավելի շատ նեղվեց, քան «Ադրբեջանի անշարժ գույքի գործակալ» բնորոշումից»,- ասաց նա:

Անդրադառնալով ընդդիմության գործունեությունից դժգոհություններին` Քոչարյանը նկատեց, որ ԱԺ-ն հարթակ է, որ իրենք փորձում են օգտագործել:

«Իսկ դրա այլընտրանքը որն է: Կա խորհրդարան, որտեղ մենք ընտրություններում չենք ունեցել այն արդյունքը, որ ակնկալում էինք, բայց ունենք այն, ինչ ունենք: «Հայաստան» դաշինքն ունի 29 մանդատ, «Պատիվ ունեմ»-ը ունի 5-6 մանդատ: Սա հարթակ է, որտեղ մենք հնարավորություն ունենք խնդիրներ բարձրաձայնելու, ուղիղ երեսներին հարցերը տալու, այդ հարցերը բարձրացնելու:

Ես լսում եմ քննադատություն, ասում են՝ ո՞ր հարցի պատասխանը չգիտեն, որ հարց են տալիս Նիկոլ Փաշինյանին: Այստեղ խնդիրն այն է, որ մեր երկրում դեռևս կան մեր շատ հայրենակիցներ, որոնք այլ ձև են պատկերացնում, տեսնում են միայն իշխանության քարոզչության կողմից մատուցվող նարատիվները: Մեր խնդիրը մոլորված հայրենակիցների աչքերը բացելն է, մեր տեսակետը ցույց տալը, այն հույսով, որ ի վերջո, կհասկանան՝ ովքեր են այս իշխանություններն իրականում: 

Մենք կառչած չենք մանդատներից և եթե ունենանք այն համոզմունքը, որ մանդատները վայր դնելով մեր հիմնական խնդիրը կլուծվի, միանշանակ կգնանք դրան: Երբ ասում են՝ մանդատները դնելով ճգնաժամ կլինի՝ այդպես չէ»,- ասաց նա։