Ինեկոբանկն ընդդեմ թոշակառուների․․․ Քաղաքացու իրավունքների պաշտպան
«Քաղաքացու իրավունքների պաշտպան» ՀԿ-ի նախագահ Կարեն Հեքիմյանը գրել է․
«Ինչպես գիտեք, անկանխիկ եղանակով վճարումներից բանկերը թոշակառուներին 10%-ի չափով հետվճար են տրամադրում: Սակայն, պարզվում է, որ, օրինակ` Ինեկոբանկը (Inecobank CJSC) հետվճարը տրամադրում է ոչ բոլոր դեպքերում:
Բանկի աշխատակից Տաթևն ասում է, որ կոմունալ վճարներն «անկանխիկ վճարումներ» չեն համարվում, հետևաբար` դրանցից թոշակառուները հետվճար չեն ստանում: Իսկ, օրինակ` առցանց Երևան-Թբիլիսի ավտոբուսի տոմս գնելուց թոշակառուն հետվճար կստանա՞: Տաթևը դժվարացավ պատասպանել այդ հարցին, սակայն պնդեց, որ Ինեկոբանկում առկա է «ցուցակ» որում նշված են այն բոլոր դեպքերը, երբ հետվճար չի վճարվում: Տաթևը խոստացավ րոպեների ընթացքում ծանոթացնել այդ ցուցակին, սակայն խաբեց: Բանկի մեկ այլ աշխատակից Արփին խոստացավ կարճ ժամանակահատվածում Տաթևին հիշեցնել իր «խոստման» մասին:
Ցավոք, անհետացավ նաև Արփին: Ինչևէ: Այլ եղանակով վերջապես կարողացա ձեռք բերել Ինեկոբանկի «ցուցակը»: «Ցուցակը» շատ երկար չէր: Կարդացի:
Չհասկացա շատ կարևոր եզրույթ: Ուրեմն, ըստ Ինեկոբանկի, թոշակառուներին հետվճար չի տրամադրվում այն գործարքներից, «որոնց արդյունքում քարտապանն իրականացնում է միջոցների տեղափոխում` առանց իրական ապրանք կամ ծառայություն ձեռք բերելու»: Հիմա, ենթադրենք` թոշակառուն անկանխիկ եղանակով վճարում է հոգեբանին խորհրդատվության համար: Դա իրական ապրա՞նք է, թե՞ ծառայություն: Իսկ ո՞վ է որոշելու այդ «ապրանքի» կամ «ծառայության» իրական կամ անիրական լինելու հանգամանքը:
Կամ` եթե թոշակառուն անկանխիկ եղանակով վճարում է սպառած էլեկտրաէներգիայի (գազի, ջրի, ինտերնետի, աղբի) դիմաց, ապա արդյո՞ք էլեկտրաէներգիայի (գազի, ջրի, ինտերնետի) մատուցումը կամ աղբի հեռացումը ծառայություն չէ: Բա ի՞նչ է: Ըստ Ինեկոբանկի, թոշակառուները չպետք է քարտերով կոմունալ վճարներ վճարեն: Այսինքն, Ինեկոբանկն, օրինակ` գազի կամ ինտերնետի մատակարարումն «իրական ծառայություն» չի համարում:
Ստացվում է, եթե թոշակառուն այլ եկամուտներ չունի, սակայն էլեկտրաէներգիա, գազ և ջուր է օգտագործում, ունի ինտերնետ ու վճարում է աղբահանության համար, ապա գրեթե չի կարող օգտվել Ինեկոբանկի հետվճարից: Այսպես է Ինեկոբանկը «պայքարում» թոշակառուների դեմ»:
