Արցախցիները մեղավոր չեն, որ ծնվել են այնպիսի տարածքում, որի իրավական կարգավիճակը դեռևս միջազգայնորեն հանգուցալուծված չէ, նրանք «փախստականներ» են և պետք է օգտվեն իրենց վերադարձի իրավունքից. Սահակյան

Արցախցիները մեղավոր չեն, որ ծնվել են այնպիսի տարածքում, որի իրավական կարգավիճակը դեռևս միջազգայնորեն հանգուցալուծված չէ, սակայն նրանք ունիվերսալ սկզբունքի հիման վրա պետք է կարողանան օգտվել բոլոր այն իրավունքներից, ինչից օգտվում ենք մենք: Այս մասին հրավիրված մամուլի ասուլիսում ասաց իրավապաշտպան Սիրանուշ Սահակյանը:

Նրա խոսքով` Հայաստանի Հանրապետության կողմից տրամադրված անձնագրերն ամենևին չեն նշանակում, որ արցախցիները ՀՀ քաղաքացիներ են, ավելին` նրանք չեն կարող օգտվել քաղաքական իրավունքներից, օրինակ ընտրելու և ընտրվելու իրավունքներից: 

«Քաղաքացիությունը նախ և առաջ անձի և պետության իրավաքաղաքական կապն է, եթե մենք այս քաղաքական կապի տարրը չունենք, նշանակում է` նրանք չեն կարող ընկալվել քաղաքացիներ: Ուստի դասական առումով նրանք փապխստականներ են և պետք է օգտվեն իրենց վերադարձի իրավունքից: Միջազգային իրավունքը պահանջում է, որ այդ վերադարձը լինի ապահով և անվտանգ, ապահովությանը և անվտանգությանը ներակայացվող  չափորոշիչներ գոյություն ուենն: Համենայն դեպս, արձանագրված ռասիստական քաղաքականության պայմաններում, երբ ենթարկվել են բռնի դեպորտացիայի, առանց իրադրության էական փոփոխությունների չի կարող այդ վերադարձն ընկալվել որպես անվտանգ: Կարևոր է նաև միջազգային մեխանիզմների առակայությունը: Մենք տեսանք անգամ, որ ռուս խաղաղապահների գոյությունը չկանխեց բռնի տեղահանումը, ուստի ավելի լրջագույն մանդատով և միջազգային ներկայության մեխանիզմներ կարող են գործարկվել, որպեսզի այս վերադարձը իրական լինի»,- ասաց Սահակյանը: