Նիկոլ Փաշինյանը Հայաստանը սարքում է թնդանոթի միս. սա եվրաինտեգրում չէ, սա հակաՌուսաստան դառնալու քայլ է. Շարմազանով

2018 թվականից մինչ օրս բոլոր միջազգային հարթակներում, որտեղ Հայաստանի Հանրապետությունը ներկայացվել է ՔՊ-ական խմբակի և նրա կապիտուլյանտ ղեկավարի տեսքով, որևէ լավ արդյունք ՀՀ-ի համար չի գրանցվել և նույնիսկ ամենալավ փաստաթուղթը Նիկոլ Փաշինյանի կառավարման պարագայում դառնում է հակահայկական փաստաթուղթ: Այս մասին այսօր լրագրողների հետ զրույցում ասաց ՀՀԿ մամուլի խոսնակ Էդուարդ Շարմազանովը` մեկնաբանելով վաղը Բրյուսելում կայանալիք հանդիպումը: 

«Մենք 2018 թվականին Նիկոլ Փաշինյանին թողել են փայլուն փաստաթուղթ Հայաստանի և ԵՄ-ի միջև, որը կոչվում է CEPA, այդ փաստաթղթում և′ տնտեսական մասով, և′ քաղաքական-ինստիտուցիոնալ բարեփոխումների մասով, և′ արցախյան հարցի վերաբերյալ շատ կարևոր շեշտադրումներ կային, ըստ որի` ԵՄ-ն և ԵՄ անդամ բոլոր երկրներն օրենքի ուժով ճանաչում են Արցախի ժողովրդի ինքնորոշման իրավունքի իրացումը: Այսինքն` Նիկոլ Փաշինյանին մեր իշխանությունը ժառանգել է Հայաստան- Եվրամիություն պայմանագիր, որտեղ Եվրոպական միության բոլոր երկրները ճանաչել են Արցախի ժողովրդի ինքնորոշման իրավունքի իրացումը: Ի՞նչ արեց Նիկոլ Փաշինյանը` Արցախը ճանաչեց Ադրբեջանի կազմում, նույն եվրոպական հարթակում: Ավելին` մեր բանակցած CEPA-ն և մեր պայմանագիր կնքած CEPA-ն չի եղել ռուսական և եվրոպական շահերի հակադրության արդյունքում, եղել է հայկական շահերի սպասարկման արդյունքում, եղել է եվրոպական և ռուսական հետաքրքրությունների և շահերի փոխլրացման արդյունքում, ոչ թե հակադրության, ի՞նչ է անում Փաշինյանն այսօր»,- հարցրեց Շարմազանովը և ինքն էլ պատասխանեց հարցին:

Նա նշեց, որ Փաշինյանը ոչ թե Հայաստան-Եվրամիություն հարաբերություններ է հաստատում, ոչ թե խորացնում է Հայաստանի եվրաինտեգրացիան, այլ Հայաստանը սարքում է հայկաՌուսաստան` Հայաստանը դարձնելով թնդանոթի միս:

«Սա եվրաինտեգրում չի, սա Հայաստանի հակաՌուսաստան դառնալու հերթական քայլն է: Դրա մասին չեն էլ թաքցնում եվրոպացի պաշտոնյաները, մարդիկ բացահայտ ասում են` Բլինքենը չասե՞ց` Ալիև ջան, մի' անհանգստացի, սա քո դեմ ուղղված չի, բա ո՞ւմ դեմ է  ուղղված` Ռուսաստանի՞, Իրանի՞: Դե տենց էլ ասեք, իսկ Հայաստանի կառավարիչները չեն հասկանում, որ ուկրաինական պատերազմից հետո աշխարհը դարձել է ռեգիոնալ, և այստեղ կա երեք խոշոր խաղացող` Թուրքիա, Ռուսաստան, Իրան: Իրանի նախագահը հազար անգամ հայտարարել է, որ Իրանը չի ողջունում, անհանգստացած է արտատարածաշրջանային ուժերի մուտք գործելով մեր տարածաշրջան: Եթե դու Իրանի շահը հաշվի չես առնում, Ռուսաստանի շահը հաշվի չես առնում, ոչ միայն հաշվի չես առնում, այլ նաև հակադրվում ես այդ շահերին, քեզ էլ սարքում ես պոլիգոն Արևմուտք-Ռուսաստան հակամարտության մեջ, որևէ լավ բան ակնկալել պետք չի»,- ասաց ՀՀԿ-ական գործիչը: