Թե մինչև երբ քաղբանտարկյալների գործով դատարանը կփորձի ապացուցել, որ մածունը սև է, դժվարանում եմ ասել

Հայաստանի Հանրապետական կուսակցության  փոխնախագահ, քաղբանտարկյալ Արմեն Աշոտյանը կալանավայրից հեռավար կարգով պատասխանել է քաղաքացիների կողմից իրեն ուղղված հարցերին։

Մարգարիտա Մեսրոպյանը հարցրել է․ «Ձեր դատավարության ընթացքում՝ այս վերջին նիստին պարզ դարձավ, որ դատախազությունն անգամ ճիշտ տվյալներ չի ներկայացնում դատարանին։ Ինչ կասեք այս ամենի մասին»։

Արմեն Աշոտյանը պատասխանել է․ «Շնորհակալ եմ Ձեզ և տասնյակ հազարավոր իմ հայրենակիցներին՝ աջակցության, ուշադրության և համերաշխության համար: Հայ ժողովրդի մեծամասնությունն այլևս քաջ գիտակցում է և գիտի, որ իմ դեմ քրեական գործը ոչ միայն թքած-կպցրած է, ոչ միայն ապօրինի է, այլև անգրագետ։ Այն բաղկացած է մեծ և փոքր խախտումներից, հորինվածքներից  և ապօրինություններից։ Խոշոր տրամաչափի բոլոր սարքոցիների և կամայականությունների նկատմամբ, որոնք  դրսևորել են քննչական մարմինները, դատավորը դեռևս ծայրահեղ  լոյալ է, աչք է փակում դրանց վրա, ավելին, փորձում հիմնավորել այդ ապօրինությունները՝ սկսած մեղադրանքիցմ վերջացրած իմ 10-ամսյա կալանքով։ Ու այս ամենը է՛լ ավելի աբսուրդային է դարձնում այս քրեական գործը։ Փոքր տրամաչափի խախտումների մակարդակում դատարանն իրեն շռայլություն է թույլ տալիս ճշմարիտ և օբյեկտիվ գնահատականներ տալ, ինչպես եղավ վերջին նիստում։

Անկախ Հայաստանի դատական  համակարգի խայտառակ կախյալությունից և քաղաքականացվածությունից, աչքեր ունեցողը տեսնում է, ականջ ունեցողը լսում է, թե ինչ է կատարվում ոչ միայն իմ, այլևս մյուս քաղաքական բանտարկյալների նիստերին։ Թե մինչև երբ նման գործերով դատարանները կփորձեն ապացուցել, որ մածունը սև է, ածուխը՝ սպիտակ, իսկ երկրագունդը` տափակ, դժվարանում եմ ասել։ Ակնհայտ է, որ Հայաստանում այլևս կալանավորների overdose է։ Ցանկացած երկրի համար քաղբանտարկյալներ ունենալը խարան է։ Եվ եթե ոմանք ջայլամների պես գլուխները ավազների մեջ մտցրած՝ չտեսնելու են տալիս այս հարցը, ապա միևնույն է, այդ խարանը դաջվում է նրանց դուրս ցցված մարմնամասի վրա»։