Պայքար անբարեխիղճ մրցակցության դեմ.Էդմոն Մարուքյան

ԱԺ պատգամավոր Էդմոն Մարուքյանը դիմել է Տնտեսական մրցակցության պաշտպանության պետական հանձնաժողովին`  «Վեգա» խանութի նկատմամբ համապատասխան վարույթ  հարուցելու ակնկալիքով: Այդ մասին պատգամավորը գրառել է իր ֆեյսբուքյան էջում:

«Ինչպես խոստացել էի, այսօր դիմել եմ ՀՀ տնտեսական մրցակցության պաշտպանության պետական հանձնաժողով՝ սպառողներին մոլորեցնելու վերաբերյալ գրությամբ՝ մասնավորապես հայտնելով, որ «Վեգա» էլեկտրատեխնիկայի խանութների ցանցը հունվար ամսին հաղորդագրություններ է տարածել իր ապրանքների ամբողջ տեսականին ինքնարժեքով վաճառելու վերաբերյալ: Սակայն, այցելելով Երևանի Զեյթուն համայնքում գտնվող «Վեգա» խանութի մասնաճյուղը, հայտնաբերել եմ, որ հաղորդագրությունը չէր համապատասխանում իրականությանը, քանի որ ակնհայտ էր, որ վաճառքի գները որևէ կերպ չէին կարող ինքնարժեք լինել: Նշեմ նաև, որ ինքնարժեքը, որպես տնտեսագիտական կատեգորիա, դրամական ձևով արտահայտում է բացառապես ապրանքի արտադրության (ձեռքբերման) և իրացման վրա կատարված ձեռնարկության ընթացիկ ծախսերը։ Այսինքն, որևէ այլ ծախս ինքնարժեքի մեջ հաշվարկվել չի կարող և ենթադրում է ապրանքի հավելյալ արժեք: Նշված փաստերը համապատասխանում են հասարակությանը մոլորեցնելու և հետևաբար նաև անբարեխիղճ մրցակցության սահմանումներին: Ընդ որում, նշվածը Հանրապետությունում տարածված պրակտիկա է:

Ելնելով նշված փաստերից՝ հանձնաժողովի նախագահից խնդրել եմ ընթացք տալ իմ պաշտոնական դիմումին, հարուցել համապատասխան վարույթ և խախտումներ հայտնաբերելու դեպքում օրենքով սահմանված կարգով լուծել պատասխանատվության հարցը»,-գրել է Էդմոն Մարուքյանը: