Սուրիկ Խաչատրյանը ընտրվեց` մյուսներից հետ չմնալու համար

Պատմափիլիսոփայության դոկտորի կոչում ստացած Սյունիքի մարզպետ Սուրիկ Խաչատրյանը կրկին ընտրվել է Գորիսի պետական համալսարանի կառավարման խորհրդի նախագահ:

Նկատենք, որ Գորիսի համալսարանի նախկին ռեկտոր, պրոֆեսոր Յուրա Սաֆարյանը, ժամանակին ընդդիմացել էր խորհրդի նախագահի պաշտոնում մարզպետին նշանակելու առաջարկին: Ավելին` նա հայտարարել էր, թե Սուրիկ Խաչատրյանի ինտելեկտն ու կրթական ցենզը չեն բավարարում այդ պաշտոնում աշխատելու համար: Սաֆարյանը նշեց նաև, որ այդ մարդը (Լիսկան) տզրուկի նման ծծում է սյունեցիների արյունը:

Սակայն այսօր, newspress.am-ի հետ զրույցում, նախկին ռեկտորը զերծ մնաց հիշյալ որակավորումներից:

Հարցին, թե արդյո ՞ ք կապված չէր ռեկտորի իր պաշտոնից հեռացումը Սուրիկ Խաչատրյանի նոր նշանակման հետ, Յուրա Սաֆարյանը հերքեց:

«Հաստատ համոզված եղեք, որ դա չի եղել պատճառը: Ոչ մի քաղաքական ենթատեքստ չհետապնդենք: Պետք է տեղափոխվեի այլ աշխատանքի և տեղափոխվեցի` իմ դիմումի համաձայն: Էստեղ լավ է, աշխատավարձս ավելի բարձր է, աշխատանքս էլ` ծավալուն»,- ասաց Յուրա Սաֆարյանը` դարձյալ կրկնելով, որ լրացել էր իր պաշտոնավարման երկրորդ 5 տարին ու արդեն պետք է հեռանար:

Նախկին ռեկտորի խոսքով` բոլոր մարզպետները համալսարանի կառավարման խորհրդի նախագահներ են: Նրա կարծիքով` Սուրիկ Խաչատրյանը չի ցանկացել հետ մնալ մյուսներից:

Թե ի՞ նչ է այս ժամանակահատվածում արել Սյունիքի մարզպետը համալսարանի համար հարցին, Յուրա Սաֆարյանը ծիծաղեց, ապա հորդորեց նրանից իմանալ` հավելելով, որ համալսարանի կառավարման խորհրդի նախագահի աշխատանքի մեջ մտնում է հաշվետվությունների ընդունումը ռեկտորի հաստիքացուցակի հաստատումը, կադրային փոփոխություններն ու կառուցվածքային փոփոխությունը:

«Ես չեմ ուզում ասել լավ կամ վատ, դա անցած էտապ ա, եթե գիտության ազգային ինստիտուից հարցնենք, ես կասեմ ինչ-որ պետք ա… հիմա ինքը նախագահ է, չէ ՞, էլ ես ավելորդ ի՞նչ ասեմ», – եզրափակեց Սաֆարյանը: