Հայաստանում 2023-ին միջին աշխատավարձը աճել է 14,6 տոկոսով, իսկ գները ընդամենը 2 տոկոսով. ՔՊ-ական պատգամավոր

Անցյալ տարի, 12-ամսյա կտրվածքով, այսինքն՝ 2023 թվականի դեկտեմբերը նախորդ տարվա դեկտեմբերի համեմատ, ունեցել ենք ոչ թե գնաճ, այլ գնանկում 0,6 տոկոսային կետի չափով, իսկ միջին գնաճը տարեկան կազմել է 2 տոկոս: Այս մասին, այսօր՝ ապրիլի 11-ին, ԱԺ-ում ասաց ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանը՝ անդրադառնալով քննադատություններին՝ կապված գնաճի հետ։

Նա նշեց, որ նույն ժամանակահատվածում Հայաստանում միջին աշխատավարձը աճել է 14,6 տոկոսով:

«Այսինքն՝ ունենք աշխատավարձերի առաջանցիկ աճ գների նկատմամբ: Ունենք նաև արտահանման առաջանցիկ աճ ներմուծման նկատմամբ, տուրիզմի էական աճ՝ մոտ 40 տոկոսով: Անցած տարի Հայաստան է այցելել ավելի քան 2,3 միլիոն զբոսաշրջիկ: Աշխատանքի արտադրողականությունը ՀՀ-ում վերջին երեք տարում աճել է 1,5 անգամ: 2023 թվականի տվյալներով՝ 1 ժամ աշխատաժամանակի արժեքը եղել է 9,6 դոլար, իսկ 2021-ին այդ ցուցանիշը 6,2 դոլար էր: Գործազրկության մակարդակը կազմել է 12 տոկոս, մեր ծրագրով նախատեսում ենք գործազրկության մակարդակը իջեցնել 10 տոկոսից»,- ընդգծեց Բաբկեն Թունյանը:

Նա կարևորեց կապիտալ ծախսերի հետ կապված ցուցանիշները, որոնք բավական կոշտ քննադատությունների են արժանացել։

«Անցյալ տարի կապիտալ ծախսերի ճշտված պլանը եղել է 516 մլրդ դրամ, կատարողականը եղել է շուրջ 96 տոկոս, այսինքն՝ մենք մի կողմից բարձրացրել ենք կապիտալ ծախսերի շեմը և ապահովել ենք ավելի բարձր կատարողական, ինչը նշանակում է՝ տնտեսական աճի պոտենցիալը գալիք տարիների համար բավականին ավելացել է»,- ասաց նա։

Թունյանը չմոռացավ նշել նաև, որ այս ամենի հետ 2023-ին եղել են նաև ֆորսմաժորային իրավիճակներ, սակայն, նրա որակմամաբ, Հայաստանի տնտեսությունը ցուցադրել է բարձր դիմադրողականություն և կարողացել է պատշաճ արձագանքել մարտահրավերներին: