Մի կրակոցով երկու նապաստակ՝ կառավարությունը լուծեց «Նաիրիտ»-ի հարցը

«Նաիրիտ» գործարանում գույքագրում է կատարում հայաստանյան «Գրանթ Թորնթոն» աուդիտորական ընկերությունը։ Մամուլում շրջանառվում է, որ գույքագրման նախաձեռնողը ՀՀ Էներգետիկայի և բնական պաշարների նախարարությունն է, որն այդ աշխատանքի համար ընկերությանը վճարել է 115 մլն դրամ։

Նախորդ շաբաթ նաիրիտցիների հետ հանդիպման ժամանակ Էներգետիկայի և բնական պաշարների փոխնախարար Լևոն Շահվերդյանն ասել էր, թե պետք է տարանջատեն գույքն ու տարածքները, և այն, որը պետք է «Նաիրիտին» հետագայում վերագործարկման ժամանակ, փոխանցվելու է Երևանի ՋԷԿ-ին, իսկ այն մասը, որը պետք չէ, տալու են «Նաիրիտ 2»-ին։ Վերջինս պետք է վաճառի այդ գույքն ու ետ վերցնի նաիրիտցիներին վճարված աշխատավարձի գումարը։

Newspress.am-ի հետ զրույցում Նաիրիտ գործարանի նախկին մամուլի քարտուղար Անուշ Հարությունյանը նշեց, որ այստեղ պետությունը և «Նաիրիտ 2»-ը միմյանց հետ ընդհանուր հայտարարի գալու խնդիր ունեն: Անուշ Հարությունյանը հիշեցրեց, որ աչքաթող է արվել այն, որ 2008 թվականին «Նաիրիտ» գործարանը դատարանի միջոցով շուրջ 4.2 միլիարդ էր շահել 100% պետական բաժնեմաս ունեցող «Նաիրիտ-2» ՓԲԸ-ի հանդեպ։ Դա վերաբերում է Նաիրիտի հոսքագծերից մեկի վաճառքին, որը «Նաիրիտ-2»-ի միջոցով տրվել է չինական կողմին առանց դրա համար վճարելու:

Չգիտես, թե ինչու նաիրիտցիների աշխատավարձերը ուշացած վճարելու ժամանակ «Նաիրիտ-2» -ի պարտքի մասին չէր խոսվում, փոխարենը նաիրիտցիներին առաջ պայմաններ էին դնում, թմբկահարում , որ պարտք վերցնում, տույժ- տուգանքներ չպահանջեն. «հիմա թող պետությունը և «Նաիրիտ-2»-ը իրենց հարցերը լուծեն, ես այլևս այդտեղ չեմ աշխատում, տեղեկատավություն չունեմ ինչ են պատրաստվում անել»,- ասաց Անուշ Հարությունյանը:

Նա անդրադարձավ նաև գույքի վաճառքին, ասաց, որ գույքի մի մասի վաճառքի պարագայում էլ անգամ ուշացած է:
Անուշ Հարությունյանը նաև շեշտեց, որ վերագործարկման համար պայքարը շարունակելու են, ակցիաների միջոցով իրենց պահանջները ուշադրության կենտրոնում են պահելու: