Շատ մի ուրախացեք, խորհրդային ավանդները դարձյալ սառույցին են

Վերջին շրջանում խորհրդային բանկերում ավանդներ ունեցող մինչև 1931թ-ի դեկտեմբերի 31-ը ծնվածների և նրանց ժառանգների շրջանում կարծես թե սպասելիքներ կային, որ այդ գումարները կստանան: Սակայն ինչպես պարզվում է, այդպես չէ, ուրախանալու առիթ չկա: Որպես պաչզաբանում նշենք, որ խորհրդային բանկերում ունեցած ավանդների դիմաց փոխհատուցման գումարը կարող է որպես ժառանգություն վճարվել միայն այն դեպքում, երբ ավանդատուն մահացել է նրա տվյալները փոխհատուցման վճարման ցուցակում ներառվելուց հետո: Միայն դրանից հետո այդ գումարը տրվելու է նրա ժառանգին (նոտարի կողմից տրված ժառանգության իրավունքի վկայագրի հիման վրա):

Օրինակ, եթե այս տարի պետք է ավանդները ստանար 100 մարդ, որից 20-ը մահացել է, ապա այդ գումարը մնում է ինչ-որ անորոշ տեղ և տվյալ պարագայում կառավարությանը ձեռնտու է այդ գումարը տեղ հասցնել` տալով ժառանգներին, ոչ թե թողնել անորոշ ինչ-որ մի տեղ, այն դեպքում, երբ այդ գումարներն արդեն դուրս են գրվել: Այս միջոցով կառավարությունը, մասնավորապես աշխատանքի և սոցիալական հարցերի նախարարությունը իր գործառույթներն է կարգավորել:

Թեև կառավարությունը վերջերս փոփոխություններ է կատարել նախկին որոշման մեջ և հանել է «անապահովություն» ցուցիչը, այսինքն, եթե ծնվել էին մինչև 1931թ-ը, և եթե անապահովության որևէ ցուցիչ ունեին, ապա նրանց տրվում էր գումարը, եթե անապահովության ցուցիչ չունեին` չէր տրվում:
Հիշեցնենք, որ լուսահոգի արտիստուհի Վարդուհի Վարդերեսյանը փորձել էր  ստանալ իր ավանդը, պարզվել էր, որ նա «գումարն ստանալու համար պետք է լրացնի «Փարոս» կազմակերպության ստորացուցիչ մի փաստաթուղթ, որտեղ նշվի, որ անձը հասել է աղքատության շեմին»:

Նշենք, որ 2015 թվականի հունվար ամսից փոխհատուցում կարող են ստանալ ընտանիքի անապահովության գնահատման համակարգում հաշվառված, 0-ից բարձր միավոր ունեցող ընտանիքների անձինք, մինչև 1931 թվականի դեկտեմբերի 31-ը ծնված, իսկ մինչև այդ ստանում էին 1929թ-ի ծնվածները, ովքեր ունեին անապահովության ցուցիչ:

Հիմա այնքան էլ պարզ չէ, թե ընդհանրապես կստանան իրենց գումարները մինչև 1931թ-ի ծնվածներն, ովքեր ավանդներ ունեին բանկերում և այժմ մահացել են, կամ ինչպես է լուծվելու մինչև 1931թ-ի դեկտեմբերի ծնվածների հարցը, ովքեր մինչ այդ ընդգրկված չէին ցանկերում, քանի որ չունեին անապահովության ցուցիչ:
Այնպես որ, ոգևորվել պետք չէ: Կառավարությունը երբեք այնպիսի քայլ չի անի, որ թեթևացնի իրենց կյանքի մայրամուտում գտնվող քաղաքացիների խնդիրը: Կառավարությունը ավելի շուտ որևէ օլիգարխի կազատի ԱԱՀ-ից ու կուղորդի ստվեր, կամ կչեղարկի միլիոնավոր դրամների տույժ ու տուգանքները: