Որտե՞ղ է սիթքոմներով ապրած ու իր խաղացած կերպարների տակ մնացած Հայկ Մարությանը

Երևանի նախկին քաղաքապետ, նախկին ՔՊ-ական, իսկ ավելի ուշ արդեն «Ազգային առաջընթաց» խմբակցության «ընդդիմադիր» անդամ դարձած Հայկ Մարությանը՝ զրկվելով ավագանու անդամի մանդատից ու քաղաքապետարան մտնելու հնարավորությունից, դեռ 3 շաբաթ առաջ խոստացավ «Նոր ուժ» անունով  ռեֆորմիստական կուսակցություն հիմնել ու իր ուժը ներդնել երկրի բարօրության համար։

Իր իսկ թիմի, կամ ինչպես ինքը կասեր, «թմի» կողմից պաշտոնանկ արված քաղաքապետի «Նոր ուժ»-ի նպատակը հանրաքվեներին, պետական և տեղական ինքնակառավարման մարմինների ընտրություններին մասնակցելու և հասարակության ու պետության քաղաքական կյանքին մասնակցության այլ ձևերով ժողովրդի քաղաքական կամքի ձևավորմանն ու արտահայտմանը նպաստելն է:

Այս օրերին, երբ ժողովրդի քաղաքական կամքը ոտնահարվում է երկիրը ղեկավարող ռեժիմի կողմից ու ժողովրդի կամքին հակառակ, իշխանությունը հողեր է հանձնում թշնամի երկրին՝ Ադրբեջանին, հարց է առաջանում, թե՝ ո՞ւր են իրենց ընդդիմադիր հռչակած  քաղաքական ուժերը՝ այդ թվում նաև Հայկ Մարությանը՝ իր «թմով»:

Իհարկե, չի քննարկվում, որ որոշ կուսակցություններից 2-3 անդամ եղել են Տավուշում ու կանգնել ժողովրդի կողքին։ Հարցն այն է, որ վերևից ամպագոռգոռ հայտարարություններ անողներն այս օրերին ստվերում են։

NEWSPRESS.am-ը փորձեց պարզել, թե՝ չի՞ պատրաստվում արդյոք Մարությանը մեկնել Տավուշ։ Սակայն մեր զանգերը մնացին անպատասխան․ իսկ ավելի կոնկրետ՝ հեռախոսի ինքնապատասխանիչը (автоответчик) մեզ «տեղեկացրեց», որ «բաժանորդը ժամանակավորապես անջատել է հեռախոսը»․․․

NEWSPRESS.am-ը նաև տեղեկացավ, որ բաժանորդի հեռախոսի «ժամանակավորապես անջատումները» կապված են երկրից նրա բացակայության հետ։

Մեր տեղեկություններով` ոսկե սարեր խոստացած ու «ընդդիմություն» խաղացող Հայկ Մարությանն այս օրերին անգամ երկրում չէ։

Թե կոնկրետ որտեղ է Հայկ Մարությանը՝ առայժմ ձեռնպահ կմնանք հրապարակելուց։ Միայն հարկ է նկատել, որ թերևս անիմաստ էր մեծ սպասումներ ունենալ դերասան Հայկ Մարությանից, ով ապրել է սիթքոմներով ու մնացել իր խաղացած կերպարների տակ։

Արմինե Մկրտումյան