Ֆրանսահայերը «շոկի» մեջ են Նիկոլ Փաշինյանի քայլից

ՀՀ-ն Մարդու իրավունքի նոր պաշտպան ունի: Պաշտպանի թեկնածությունը առաջարկեց ՀՀԿ-ն, ԱԺ-ն էլ իր ընտրությամբ հաստատեց ՀՀԿ թեկնածուի լեգիտիմությունը: Այս պարագայում թերևս մի արտառոց բան կար, ընդդիմադիր դիրքերից ելույթ ունեցող Նիկոլ Փաշինյանը հայտարարեց, որ ինքը կողմ կքվեարկի ՀՀԿ-ի առաջարկած թեկնածու Արման Թաթոյանին: Նիկոլ Փաշինյանի այս հայտարարությունը թերևս հասկանալի կլինի միայն իրեն, բայց ամեն օր ՀՀԿ-ի ու նրա առաջարկած տարատեսակ պաշտոնյանների կողմից արտագաղթի ճանապարհը բռնած ընտրողին ու նրա ընտանիքին անհասկանալի է, թե որտեղից ծնվեց Նիկոլ Փաշինյանի մոտ այդքան վստահություն Հանրապետականի առաջարկած երիտասարդի նկատմամբ:

«Ես որոշել էի կողմ քվեարկել և այսօր էլ համոզվեցի, որ կողմ եմ քվեարկելու Արման Թաթոյանի թեկնածությանը»,- ԱԺ-ում հայտարարեց ընդդիմադիր պատգամավորը` իր որոշումը մեկնաբանելով որպես պոստ ֆակտում` վստահության քվե, Հայաստանում մարդու իրավունքների պաշտպանության ինստիտուտին: Վստահությունը վստահություն, բայց գլխավոր հարցը մնում է օդում կախված`ինչո՞ւ Փաշինյանը վստահեց ՀՀԿ-ի այս թեկնածուին, բայց օրինակ ՀՀԿ մեկ այլ թեկնածու Կոստանյանին չվստահեց, ով ԱԺ քվեարկությամբ ընտրվեց ՀՀ գլխավոր դատախազ: Կոստանյանը, ով նույնքան երիտասարդ էր, որքան ՀՀԿ-ի Թաթոյանը, և ՀՀԿ-ի Կոստանյանը նույնքան խոստումնալից էր, որքան Թաթոյանը: Այդ ինչպե՞ս է, որ Փաշինյանի գործընկերները ՀՀԿ-ականներին որակում են անձեռնմխելի ֆեոդալներ, իսկ Փաշինյանը ընդառաջ է գնում դեպի այդ ֆեոդալը: Անհասկանալի է, ինչով է պայմանավորված Փաշինյանի աջակցությունը ՀՀԿ հերթական «զավակին»:

Ի դեպ բոլորովին վերջերս Փաշինյանը ֆրանսիահայ համայնքի հետ հանդիպման ժամանակ ՀՀ իշխանություներին անվանեց ընտրակեղծարարներ և համոզմունք հայտնեց, որ գործող իշխանությունը կեղծելու է միշտ: Ֆրանսահայերը այսօր զարմացած են Փաշինյանի գործելաոճից. «Ինչո՞ւ են Հայաստանից գալիս մեզ մոտ, խոսում մի բան, Հայաստանում կատարում բոլորովին այլ գործողություն: Մենք ֆրանսահայերս Նիկոլ Փաշինյանի այս քայլից պարզապես շոկ ենք ապրում»,- newspress.am-ի հետ հեռախոսազրուցում ասացին բառացիորեն օրեր առաջ Փաշինյանի հետ Փարիզում հանդիպած և նրա հետ հույսեր կապող, բայց արդեն հուսախաբ ֆրանսահայերը: