Բաղրամյան 26-ը Երևանի քաղաքապետարանին հանձնարարել է սահմանափակել շուրջօրյա հավաքները

«Նոր Հայաստան» հանրային փրկության ճակատ «Ընդդիմության միասնական շտաբ»-ը հայտարարություն է տարածել.

««Նոր Հայաստան» հանրային փրկության ճակատին Ազատության հրապարակից ամեն գնով հանելու իր ծրագիրն իրականացնելու նպատակով Բաղրամյան 26-ը Երևանի քաղաքապետարանին հանձնարարել է սահմանափակել շուրջօրյա հավաքները գիշերային ժամերի ընթացքում:
Հաշվի առնելով այն հանգամանքը, որ այս սահմանափակումը նախապատրաստվել է որպես հատուկ գործողություն, այն է՝ նախ վարչախմբի վերահսկողության ներքո գտնվող մամուլում Ազատության հրապարակում հերթապահող քաղաքացիների վերաբերյալ ստահոդ լուրեր են տարածվել, ապա՝ ոստիկանությունն այդ կեղծ լուրերին համապատասխանող ոստիկանական սադրանք է կազմակերպել, հիմնավոր կասկած է առաջանում, որ փետրվարի 25-ի լույս 26-ի գիշերվա ընթացքում ոստիկանությունը պատրաստվում է իրականացնել այս հատուկ գործողության վերջին արարը, որը կարող է ուղեկցվել հավաքի մասնակիցների նկատմամբ ֆիզիկական և իրավական բռնություններով:

Վարչախմբի այս հերթական ապօրինության վերաբերյալ դիրքորոշում արտահայտելու և այն կանխելու ուղղությամբ նախատեսվող քայլերի մասին տեղեկացնելու համար «Նոր Հայաստան» հանրային փրկության ճակատը փետրվարի 25-ին՝ հինգշաբթի օրը, ժամը 17:00-ին Ազատության հրապարակում հրավիրում է արտահերթ ասուլիս-քննարկում:

Ճակատի հերթական ասուլիսը տեղի կունենա հաջորդ օրը՝ փետրվարի 26-ին՝ ուրբաթ օրը, ժամը 17:00-ին՝ դարձյալ Ազատության հրապարակում, որը կանդրադառնա նաև փետրվարի 25-ի լույս 26-ի գիշերվա անցուդարձին»: