Տեղեկություն ունենք, որ Կիրանցի կամրջի մոտ հայկական կողմը մի քանի ամիս ժամանակ է խնդրել Ադրբեջանից․ Գառնիկ Դանիելյան

Երեկ դուք տեսաք՝ ինչպես էին իշխանություններն ամբողջ ուժային համակարգը կենտրոնացրել Օպերայի շենքի մոտ, ոստիկանները չէին թողնում մարդկանց ազատ տեղաշարժը։ Այս մասին Կառավարության շենքի բակում ասաց «Հայաստան» խմբակցության պատգամավոր Գառնիկ Դանիելյանը։

«Իշխանության պարագլուխը վախերի մեջ է ու ամեն քայլափոխին իր հետ տանում  է հազարավոր ոստիկանների ու ուժային համակարգի ներկայացուցիչների։ Կառավարության շենքն ամբողջությամբ պաշարված է վահաններով, մահակներով, արցունքաբեր գազով, այս մարդիկ եկել են ու փորձում են ներկայացնել, որ իրենց շեֆը կարող է անվտանգ լինել։ Ինչ այս շարժումը սկսվել է, իշխանություններն ապրում են ամենօրյա վախի մթնոլորտում, որովհետև իրապես վախենալու շատ բան ունեն, որովհետև գործում են Հայաստանի շահերի դեմ, ստորագրում են փաստաթուղթ, որով այս կամ այն հայկական բնակավայրերն անցնում են Ադրբեջանին։

Երեկ փոխվարչապետների մակարդակով հանդիպում է տեղի ունեցել ու ստորագրվել է ապօրինի, հատվածական սահմանազատման ու սահմանագծման արձանագրություն, որով Ադրբեջանին են հանձնվել Բաղանիսի, Ոսկեպարի, Կիրանցի, Բերքաբերի կենսական նշանակություն ունեցող տարածքներ, կոմունիկացիաներ։ Կիրանցից հանձնվել են տներ, որոնց տերերը սեփականության վկայական ունեն։ Այս պահին մենք ունենք տեղեկություններ, որ պայմանավորվածություն է ձեռք բերվել Ադրբեջանի հետ, որ կամրջի հատվածում պետք է գործընթացը դադարեցվի, մի քանի ամիս ժամանակ են խնդրել ադրբեջանական կողմից, որ ճանապարհը կարողանան տեղափոխել այլ մաս»,- ասաց նա։