Ինձ մի խոսացրեք, մի խոսացրեք. Ֆելիքս Ցոլակյանը` իր պաշտոնանկության մասին

Երեկ, փետրվարի 24-ին ՀՀԿ-ՀՅԴ համագործակցության համաձայնագրի ստորագրմամբ, ըստ էության, կատարվեց կառավարության որոշ պորտֆելների «հանձնման- ընդունման» արարողակարգ:

Մի շարք պաշտոնների թվում` դաշնակցությանը «հանձնվեցին» նաև Շիրակի և Արագածոտնի մարզերը:

Ավելի վաղ newspress.am-ը հայտնել էր, որ այս մարզերի կառավարումը պետք է ստանձնի Դաշնակցությունը, սակայն և Շիրակի մարզպետ Ֆելիքս Ցոլակյանը, և Արագածոտնի մարզպետ Սարգիս Սահակյանը համառորեն պնդում էին, որ իրենք նման տեղեկություն չունեն և իրենց բնականոն աշխատանքին են:

Այսօր արդեն Շիրակի մարզպետ Ֆելիքս Ցոլակյանը խոստովանում է, որ գիտեր իր ազատման մասին, սակայն newspress.am-ի հետ զրույցում, ի դեպ բավականին բարձր տրամադրությամբ, հայտնեց, որ դեռ տեղյակ չէ, թե ինչով կզբաղվի առաջիկայում:

Հարցին, թե իմանալով իր պաշտոնից ազատման մասին, արդյոք արդեն չի՞ ծրագրավորել իր անելիքները, Ֆելիքս Ցոլակյանը ծիծաղելով պատասխանեց. «Դե դուք արդեն ինձ խոսացնում եք. ինձ մի խոսացրեք, մի խոսացրեք…չգիտեմ»:

Թե ինչով էր պայմանավորված մարզպետի բարձր տրամադրությունը` նա չմանրամասնեց: Միայն խոստացավ, որ երբ կհստակեցվի իր առաջիկա անելիքները` մեզ առաջինը կհայտնի:

Ինչ վերաբերում է շրջանառվող լուրերին, ըստ որի` Ֆելիքս Ցոլակյանը կվերադառնա նախկին աշխատանքին` որպես հարկային պետական ծառայության պետ, նա արձագանքեց.

«Չէ, չէ, չէ, էդ մեկը չէ: Նման բան չկա»,- ասաց Ցոլակյանը` հավելելով, որ ամեն ինչ պարզ կլինի, երբ տան իր պաշտոնից ազատման հրամանը: