«Եկեղեցի չզբաղվել политика»․ ԱԺ նախագահ Ալեն Սիմոնյանը վախենո՞ւմ է, թե՞ պարզապես անսկզբունքային է

Ազգային ժողովի նախագահ Ալեն Սիմոնյանն արդեն որերորդ անգամ, բարձր ամբիոնից հայտարարում է, թե՝ «եկեղեցի չզբաղվել политика»․․․

 «Ինձ համար ահավոր անընդունելի է, որ եկեղեցականը, եկեղեցին զբաղվում են քաղաքականությամբ։ Չպետք է եկեղեցին զբաղվի     քաղաքականությամբ»․․․

Այսպես է արտահայտվել Ալեն Սիմոնյանն Ազգային ժողովում:

Հիշեցման կարգով նկատենք, որ վերջերս էր շրջանառվում Ալեն Սիմոնյանի այն դիրքորոշումը, ըստ որի` նա շատ կարևոր է համարում եկեղեցու մասնակցությունը քաղաքական իրադարձություններին․․․

Այս տեսանյութն արվել է 2018 թվականին ծավալված այն իրադարձությունների ժամանակ, որը գործող իշխանությունն անվանել է «թավշյա հեղափոխություն»։

Թեև այսօր այս տեսանյութը չէ, որ պետք է թարմացնի ԱԺ նախագահի հիշողությունը, ու Սիմոնյանը շատ լավ գիտի, թե ինչ է ասել այդ օրերին, սակայն նա այսօր նույն դիրքորոշումը չի արտահայտում այն պարզ պատճառով, որ, ուղիղ իմաստով, վախենում է։ Նա փորձում է իրեն համոզել ու մյուսներին վստահեցնել, թե իբր՝ եկեղեցու այս քայլը հակաքրիստոնեական է, քանի որ շատ լավ գիտի՝ իշխանությունները գալիս ու գնում են, իսկ եկեղեցին այն զորավոր ուժն է և արժեքը, որի կողքին ժողովուրդը կանգնում է՝ անկախ իշխանությունների փոփոխություններից։

Եթե այդպես չէ, ապա ինչպե՞ս ստացվեց, որ 2018-ին, երբ հազարավոր մարդիկ փողոցում էին, շատ կառույցներ, օբյեկտներ, հասարակական ու քաղաքական ուժեր շարժմանը միացան միայն այն ժամանակ, երբ փողոցում քայլելիս տեսան նաև հոգևորականներին։ Ալեն Սիմոնյանը շատ լավ է հիշում դա, ու գիտակցում է, թե ինչ ու ինչու է ասում:

Ու, ինչպես Տավուշի թեմի հոգևոր առաջնորդ Բագրատ Սրբազանն է արդարացիորեն նկատում, եկեղեցին երբեք չի խաբել իր ժողովրդին ու միշտ նրա կողքին է եղել։

Ալեն Սիմոնյանը գիտի, որ ժողովուրդն այնտեղ է, որտեղ եկեղեցին։ Ու որպեսզի ժողովրդին վանի ու հետ կանգնեցնի շարժմանը միանալու «գայթակղությունից», փորձում է էժանագին հնարքներով մանիպուլիացնել հասարակությանը՝ մեջբերելով Աստվածաշունչն ու հայտարարելով, թե՝ «եկեղեցին իր գործը թողած՝ զբաղվում է առևտրով»։

                                 «Աստվածաշնչում էլ է ասվում՝ իմ հոր տունը մի սարքեք առևտրի տեղ։ Քաղաքականությունն առևտուր է»․․․ 

Իր խոսքերը համապատասխան լսարանին տեղ հասցնելու համար, նա խոստովանեց, որ իրենք էլ են այսօր զբաղվում քաղաքական առևտրով, բայց պնդեց, որ եկեղեցու միջամտությունը քաղաքական անցուդարձին՝ անընդունելի է համարում։

Իսկ քանի որ արդեն վերոգրյալով հիշեցրինք Ալեն Սիմոնյանի` տարիներ առաջ հայտնած դիրքորոշումը, ուստի պարզ է դառնում, որ ոչ միայն նա, այլև բոլոր մյուս քպականներն իսկապես վախեցած են շարժման թափից։ Վերջիններս էլ իրենց հերթին, կարծես թշնամաբար, փորձում են ամեն կերպ նսեմացնել եկեղեցու դերն ու վարկաբեկել Բագրատ Սրբազանին։

Իհարկե, իշխանական մեծամասնության ներկայացուցիչները կարող են պնդել, թե չեն վախենում ու ամեն օր իրենց համոզել, թե՝ շարժումը շուտով կմարի, բայց իրականում նրանք, մեկը մյուսին հաջորդող հիստերիկ հայտարարություններով, հակառակն են ապացուցում։

Դա իր հերթին:

Մյուս կողմից էլ, եթե Ալեն Սիմոնյանի հայտարարությունը ոչ թե վախերի հետևանք է, այլ նա իսկապես հենց այդպես է մտածում, ուրեմն այս դեպքում ավելի վատ է, քանի որ ստացվում է, որ Հայաստանի Հանրապետության ԱԺ նախագահն անսկզբունքային է․․․

Հիմա Ալեն Սիմոնյանն ինքը պետք է որոշի՝ վախենո՞ւմ է, թե՞ պարզապես շարքային անսկզբունքային է։

Արմինե Մկրտումյան