Մտի խորհրդարան, ձախի վրա նայի՝ նախկին չե՞ն․ Գառնիկ Դանիելյանը՝ նախկին-ներկա տարանջատումների մասին

ՔՊ-ականների մեջ ինչքա՞ն նախկին կա։ Լրագրողների հետ զրույցում նշեց «Հայաստան» խմբակցության պատգամավոր Գառնիկ Դանիելյանը՝ արձագանքելով որոշ ուժերի ու մասնավորապես «Լուսավոր Հայաստան» կուսակցությանը «մտահոգող» հայտարարություններին, թե՝ այնպես չստացվի, որ նախկինները գան իշխանության։

«Մտի խորհրդարան, ձախի վրա նայի՝ նախկին չե՞ն․ նախկին ՀՀՇ, նախկին ՀԱԿ, նախկին ԲՀԿ-ական, նախկին լևոնական, նախկին հանրապետական, նախկին դաշնակցական»,- նշեց Գառնիկ Դանիելյանը։

Նա հիշեցրեց Բագրատ Սրբազանի հայտարարությունը, որ ձևավորվելիք կառավարությունը չպետք է լինի նեղ անձնական, կուսակցական ու այլ հարաբերությունների վրա։ Գառնիկ Դանիելյանը համաձայն է Սրբազանի այս դիրքորոշման հետ։

«Ես բազմիցս ասել եմ՝ էս իրավիճակում դա շատ կարևոր է»,- ասաց պատգամավորը։

Ըստ նրա` եթե ցանկացած ուժի մեջ կա պոնտենցյալ, ուրեմն ինչու այն չուղղել երկրի շահերին։ 

«Թե՛ խորհրդարանական, թե արտախորհրդարանական ընդդիմադիր շատ ընկերներ ունենք, որոնք իրենց աջակցությունն են հայտնել շարժմանը։ Այնպես չէ, որ ուզում են ամեն օր ծեծ ու ջարդի մեջ ընկնել։ Ամեն մեկն իր չափով են գործ անում։ Մարդիկ, ովքեր իրար երես տեսնել չէին ուզում, հիմա համախմբված աշխատում են միասին»,- ասաց Գառնիկ Դանիելյանը՝ կրկին հավելելով, որ գործող իշխանության մեջ էլ շատ նախկիններ կան։