Մարդիկ ռիսկ չեն անում իջնել ներքև, դեռ մի բան էլ փորձում են սպառնալիքով խոսել. Սրբազանը ՆԳՆ շենքի մոտ է
«Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը ու քաղաքացիները հանգստանալու նպատակով նստել են ՆԳՆ շենքի մուտքերից մեկի մոտ։
Ոստիկանությունը հայտարարեց, որ «Հավաքների ազատության» մասին օրենք 33-րդ հոդվածի համաձայն, հավաքի մասնակիցները պարտավոր են չփակել հավաքի անցկացման վայրի ու դրանց հարող տարածքների մուտքերն ու ելքերը։
Ակցիայի մասնակիցների մեկը հիշեցրեց, որ երեկ՝ մայիսի 28-ին, ոստիկանները փակել էին Հայաստանի առաջին հանրապետության օրվա կապակցությամբ Սարդարապատ այցելած Վեհափառի մուտքը։
«Վեհափառի մուտքն եք դուք փակել»,-գոռաց քաղաքացին։ Նրա խոսքին արձագանքելով՝ հավաքվածները միաբերան վանկարկեցին․ «Ամոթ, ամոթ»։
Բագրատ Սրբազանն էլ, պատասխանելով ոստիկաններին, նկատեց, որ ոչ թե փակել են, այլ պարզապես նստել են։
«Մենք չենք փակել, հոգնել ենք, նստել ենք»,- ասաց նա։
Այնուհետև երթով պտույտ արեցին ՆԳՆ շենքի շուրջ, ապա նստեցին շենքի մուտքի մոտ։
«Ես եկել եմ ՆԳ նախարարին հանդիպելու, բայց ակնհայտորեն մեր վճարած հարկերից օգտվող մարդիկ ռիսկ չեն անում իջնեն ներքև, դեռ մի բան էլ փորձում են սպառնալիքով խոսելու, ուժ կիրառելու», - ասաց Բագրատ Սրբազանը։
«Նախարար, իջի, նախարար իջի»,- բղավում են ակցիայի մասնակիցները։
