Ձեր քաղաքական ղեկավարը հայտարարել էր՝ Արցախը թոկ է, «աշեյնիկ ու պավադոկ», դե որ «աշեյնիկ» էր՝ պետք է կտրեիք․ ձեր քաղաքականությունը թոկը կտրելն էր, մնացածը լիրիկա է․ Արթուր Խաչատրյան

«Ասում եք` դիտորդներ։ Եվրոպացիների հետ որ խոսում ես, ասում են՝ սա անվտանգային  առաքելություն չէ»։ Այս մասին Ազգային ժողովում ասաց «Հայաստան» խմբակցության պատգամավոր Արթուր Խաչատրյանը՝ դիմելով ԱԳ նախարար Արարատ Միրզոյանին։

«Հիշո՞ւմ եք՝ ձեր կառավարության ղեկավարը ոնց էր հիմնավորում ԵՄ դիտորդների մուտքը Հայաստանի սահմաններ, որովհետև Ադրբեջանը կարծում է՝ Հայաստանն ու Ռուսաստանը պատրաստվում են Ադրբեջանի վրա հարձակվեն, դրա համար եվրադիտորդներ ենք բերում։ Դա եվրոպացիներին պատմում ես, սկսում են ծիծաղել։ Հասկանում եք, չէ՞, որ դա սուտ է»,- ասաց Արթուր Խաչատրյանը։

Նա նկատեց, որ ՀՀ դիվանագիտությունը չի կարողացել Հայաստանի անվտանգային մակարդակը բարձրացնել։ Արթուր Խաչատրյանի խոսքով` այսօր չկա մի պետություն, որ կասի՝ ես պատրաստ եմ երաշխավոր հանդիսանալ Հայաստանի և Ադրբեջանի միջև ձեռքբերված համաձայնությանը։

«Ու դա, ի դեպ, Ադրբեջանի պահանջն է»,- ասաց Արթուր Խաչատրյանը։

Նա նաև նշեց, որ Արցախում հեղաշրջում չի եղել, Արայիկ Հարությունյանը ձեռքերը լվացել ու մի կողմ էր քաշվել։

«Ձեր քաղաքական ղեկավարը հայտարարել էր՝ Արցախը թոկ է, «աշեյնիկ ու պավադոկ»։ Դե որ «աշեյնիկ ու պավադոկ» էր, պետք է կտրեիք։ Այսինքն` պատերազմով կտրվեց թոկը, որը դուք ուզում էիք  կտրել։ Մնացածը, ինչ ուզում եք ասել, լիրիկա է։ Ձեր քաղաքական թիմի պահանջը, քաղաքականությունը թոկը կտրելն էր»,- ասաց նա։