Տարածքն են սահմանազատել, նռնականման առարկան նույնականացրել․ հատուկ տակտիկական ուսումնավարժություն է

Մայիսի 31-ին ՆԳՆ ՓԾ քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի տարածքում հրշեջ-փրկարարական և ինժեներական ջոկատի սակրավորական և հորատման խմբերի փրկարարական ծառայողների մասնակցությամբ կազմակերպվել և անց է կացվել «Սակրավորական աշխատանքների իրականացման կարգը պայթուցիկ նյութերի հայտնաբերման դեպքում» և «Հորատման աշխատանքների իրականացումը» թեմաներով հատուկ տակտիկական ուսումնավարժություն:

Ուսումնավարժությունն անց է կացվել երկու տեղամասերում: 
Հայտնում են ՆԳՆ Փրկարար ծառայությունից։ 
Առաջին տեղամասում իրականացվել են սակրավորական, իսկ երկրորդ տեղամասում հորատման աշխատանքներ:

Հատուկ տակտիկական ուսումնավարժության նպատակն էր.
 

• նպաստել սակրավորական կանչերի ժամանակ ուժերի և միջոցների անհրաժեշտ աշխատանքների իրականացման կատարելագործմանը,

• ստուգել անձնակազմի պատրաստվածության վիճակը՝ իրենց առջև դրված սակրավորական խնդիրների լուծման ուղղությամբ,

• սակրավորական աշխատանքների իրականացման ժամանակ կատարելագործել հրշեջ-փրկարարական և ինժեներական ջոկատի օղակների հրամանատարների գործնական ունակությունները,

• հորատող սարքերի և ամրակապման համար սարքավորվող կոնստրուկտիվ հարթակի բացազատման աշխատանքների ժամանակ կատարելագործել հրշեջ-փրկարարական և ինժեներական ջոկատի հորատման խմբի անձնակազմի անդամների մասնագիտական հմտությունները, ինչպես նաև հրամանատարական կազմի իրական պայմաններում գործելու, ղեկավարելու ունակությունները, խմբի օղակների հրամանատարների գործնական ունակությունները։

Ըստ սցենարի՝ առաջին տեղամասը պայմանական դպրոցն էր, որտեղ նռնականման առարկա էր նկատվել: Մինչ սակրավորների դեպքի վայր հասնելը, դպրոցի զինղեկը և ոստիկանը իրականացրել էին աշակերտների և աշխատակիցների տարհանում:
 

Դեպքի վայր հասնելուն պես սակրավորներն իրականացրեցին աշակերտների և աշխատակիցների տեղաբաշխում, տարածքի սահմանազատում, նռնականման առարկայի նույնականացում:

Պարզվեց, որ հայտնաբերվածը Ֆ-1 տիպի, ձեռքի պայթուցիչով մարտական նռնակ է և անհրաժեշտություն առաջացավ հատուկ սարքերի միջոցով պայթունապաշտպան տարայի մեջ տեղադրման և անվտանգ վայր տեղափոխման՝ պայթեցման եղանակով վնասազերծելու համար, ինչն իրականացվեց հատուկ կահավորված պայթեցման հարթակում:
 

Պայթունավտանգ առարկան ոչնչացնելուց հետո կատարվեց տեղանքի զննում: Վտանգավոր ոչինչ չհայտնաբերվեց և սակրավորական խմբի ղեկավարը զեկուցեց աշխատանքների անվտանգ և ամբողջական իրականացման վերաբերյալ:
 

Ըստ սցենարի՝ երկրորդ տեղամասը Լոռու մարզի Ալավերդի քաղաքն էր, որտեղ պայմանականորեն տեղի էր ունեցել սողանք, ինչի հետևանքով վնասվել էին տներ։ Երկրաբանների կողմից իրականացվել էին հետախուզություն սողանքի վտանգավորության աստիճանը որոշելու համար՝ պարզվել էր, որ վերոնշյալ մասնագետների կողմից նշված տարածքում առկա էին ընդերքային ջրեր, որոնք պետք է հեռացվեին, հետևաբար անհրաժեշտ էր իրականացնել հորատման աշխատանքներ:

Իրականացվեցին տարածքի ուսումնասիրում և սահմանազատման աշխատանքներ, ինչպես նաև հորատման համար նախատեսված անհրաժեշտ բոլոր տեխնիկական միջոցառումները. տեղափոխող ավտոմեքենայից կոնստրուկտիվ հարթակի վրա հորատման սարքերի տեղափոխման, տեղադրման և ամրակապման, բոլոր սարքերի ճիշտ միացման ու ջրի պաշարներ հավաքելու աշխատանքներ: Պահպանելով անվտանգության կանոնները և կատարելով վերոնշյալ նախապատրաստական գործողությունները, անձնակազմը հաջողությամբ իրականացրեց հորատման հիմնական աշխատանքները:
 

Ամփոփելով հատուկ տակտիկական ուսումնավարժության ընթացքում երկու տեղամասերում իրականացված աշխատանքների արդյունքները՝ ՓԾ Քաղաքացիական պաշտպանության վարչության պետ, փ/ծ գնդապետ Տ․Պողոսյանը դրական գնահատեց ներգրավված խմբերի կատարած աշխատանքը՝ շեշտելով, որ պարբերաբար իրականացվող նմանօրինակ վարժանքները հնարավորություն են ընձեռում ապահովել ուժերի առավելագույն պատրաստվածությունը և իրական պայմաններում արդյունավետ աշխատելու ունակությունները։