Ավելի լավ է Ալեն Սիմոնյանը գրկեր Սերժ Սարգսյանին ու Վլադիմիր Գասպարյանին, ովքեր աթոռի համար մարդկանց ջшրդուփշnւր ու шրնшշшղшխ անելու հրաման չէին տվել․ սա է տարբերությունը

ԱԺ նախագահ Ալեն Սիմոնյանն անցյալն է հիշել ու տեսանյութ հրապարակել այն մասին, թե ինչպես է ինքը 2018 թվականին, ինչպես ՔՊ-ականներն են սիրում կրկնել, «թավշյա հեղափոխության» ժամանակ գրկել ոստիկանին։

Տեսանյութին կից Ալեն Սիմոնյանը գրել է․ «Ինչպես 2018-ին, այնպես էլ այսօր գրկում եմ բոլորիդ, ՀՀ իրավակարգը պաշտպանող ոստիկաններ»։

Շատ սրտաճմլիկ տեսարան, բայց․․․ սրան նայենք այլ տեսանկյունից:

Իրականում պարզ չէ, թե ինչ է անցել Ալեն Սիմոնյանի մտքով, երբ այդ պահին գրկել է ոստիկանին․ արդյոք իսկապես իրավակարգը պահելու համա՞ր է եղել այդ ջերմ գրկախառնությունը, թե՞ բերման ենթարկվելուց «գեղեցիկ ձևով» խուսափելու համար։

Ինչևէ, այսօր Ալեն Սիմոնյանն իր ակնարկով ու հրապարակած տեսանյութով, փորձում է իրեն համոզել ու մեզ վստահեցնել, թե իբր այն ժամանակ իրենք՝ ցուցարարները, ամեն ինչ արել են օրենքի շրջանակներում, դրա համար էլ իբր ոստիկաններն իրենց վրա նռնակ չեն նետել, չեն զինվել մահացու կարթաձողով, քաղաքացուն չեն զրկել ձեռքից, չեն խոշտանգել նրան ու հնարավորինս չեն նվաստացրել մարդկանց՝ ինչպես այսօր են անում։ 

Մի խոսքով, փորձում է ասել, թե՝ ոստիկանների անկարգությունները գալիս են քաղաքացիների անկարգություններից, ու ոստիկաններն ընդամենը կարգ են պահպանել․․․

Հիմա ցույց տանք այս պատմության հակառակ երեսը․․․

Ակնհայտ ու շատ պարզ է, որ 2018-ին իրավապահ համակարգը փողոց դուրս եկած մարդկանց, անհարկի ճանապարհ փակողներին ու մյուս բոլոր կարգազանցներին, բառիս բուն իմաստով չի սատկացել միայն այն պատճառով, որ այն ժամանակ երկրի նախագահ Սերժ Սարգսյանի ու ոստիկանապետ Վլադիմիր Գասպարյանի կողմից չի եղել նման հրահանգ։ Նրանք չեն ցանկացել արյուն թափել, ինչպես այսօր գործող իշխանությունն է անում՝ ջանք գործադրելով արյան գնով պահել աթոռը։

Ստացվում է այնպես, որ այն, ինչ Ալեն Սիմոնյանը վերագրում է «թավշական քայլածներին» ու նրանց օրինաչափ լինելուն, իրականում 2018-ին գործող նախագահ Սերժ Սարգսյանի ու ոստիկանապետ Գասպարյանի շնորհնք է։ 

Այնպես որ, ավելի լավ է Ալեն Սիմոնյանը 2018-ին (հիմա էլ) գրկեր Սերժ Սարգսյանին ու Վլադիմիր Գասպարյանին, ոչ թե շարքային ոստիկանի, ով պարզապես հրաման չուներ մարդկանց ջարդուփշուր ու արնաշաղախ անելու։

Արմինե Մկրտումյան